Timmisartoqarfiliornerit: Ilisimatooq tusagassiorfinnik isornartorsiuisoq

Kalaallit Nunaannit tusagassiorfiit timmisartoqarfiliornerit kinguneqaatigisinnaasaannik qulaajaaniarnermi kukkussuteqarsimasut, Birger Poppel isumaqarpoq. Aaqqissuisuunerup oqaatigaa, pineqartumut atatillugu tigussaasunik tusagassiisoqartarsimaqisoq.

Kalaallit Nunaanni tusagassiorfiit nunap oqaluttuarisaanerani aningaasaliissuteqarfigineqarsimasut annersaannik – Ilulissani, Nuummi Qaqortumilu timmisartoqarfiliornernut aningaasaliiissuteqarsimanerit pillugit innuttaasunut naammattumik ilisimatitsissuteqarsinnaasimanngillat. Taamatut isumaqarpoq Ilisimatusarfimmi Institut for Læringimi emeritus Birger Poppel.

Ilisimatooq Facebookikkut ilanngussamini allappoq:

- Kalaallit Nunaanni sanaartornermut aatsaat taamak annertutigisunik aningaasaliissuteqartoqarsimanera pillugu oqallinnermi Kalaallit Nunaanni tusagassiorfiit ajoraluartumik peqataanngilluinnarsimapput!

Birger Poppel apersorneqarami itisiliilluni oqarpoq:

- Nuummi sanaartorermi aningaasaqarneq ajalusoorsimavoq. Kujataani ajalusoorluinnarsimalluni, Ilulissanilu taamaalisoqarnissaa aamma ilimanarluni.

Sanaartornerit aningaasaqarnikkut kinguneqaataat ukkatarineqartut

- Tassunga atatillugu Inuit Ataqatigiinnit Naleqqamillu pingaarutilimmik isummertoqarneq ajornera maqaasivara. Oqaatiginikuuaat suliami suut tamaasa qaqilerniarlugit. Inatsisartuni partiinik allanik suleqateqarlutik sunik tamanik qulaajaasimanngillat, suliassat aningaasanut inatsimmut ilaatinniarlugit sukataarsimapput, taanna Sermitsiaq.AG-mut oqarpoq.

Qaqortumi suliniummut atatillugu nutaamik naatsorsuisoqarsimanera, tusagassiorfinnit aamma saqqummiunneqarsimasut akuersaarpai. Tusagassiorfiilli Ilulissani Nuummilu sanaartornerit 900 millioner koruuninik akisunerulernerisa kingornatigut aningaasaqarnikkut kinuneqaatissat tamakkiisumik malitseqartitsinissaat ujartorpaa.

Ilisimatuup tamaasa ataatsimut isigalugit oqaatigaa, tusagassiorfiit suliniutit aningaasatigut kinguneqaatissaannik saqqummiussisarnerat ajorpallaartoq:

- Qaqortumi timmisartoqarfiliornissap aningaasaqarnikkut imminut akilersinnaanissaa pillugu saqqummiussisoqarsimanngilaq. Aningaasaqarnikkut Siunnersuisoqatigiit aamma kaammattuutigisimavaat, aalajangiisimaneq eqqarsaatigeqqinneqassasoq periarfissanillu allanik misissuisoqassasoq. Tamanna tusagassiorfiit atorluarlugu piffissamik atuiffiginerusinnaasimagaluarpaat, Biger Poppel oqarpoq, nangillunilu:

- Tusagassiortut paasisimasaqanngillat, kisianni mikrofoni tigummiinnarnagu sooq apeqquteqarneq ajorpat, taanna oqarpoq.

- Tigussaasunik tusagassiisoqartarsimaqisoq

Tusagassiivimmi Sermitsiaq.AG-mi aaqqissuisuunerup pisortallu Christian Schultz-Lorentzenip Birger Poppelsip isornartorsiuinera isumaqatiginngilaa, oqaatigaluguli timmisartoqarfiliornerit qulaajaaffigissallugit suliassarujussuusoq:

- Sooruna suut tamarmik pitsaanerusumik suliarineqarsinnaasarput. Isumaqarpungali tusagassiiviup tusagassiorfii – aviisit AG Sermitsiarlu kiisalu nittartagaq Sermitsiaq.AG – timmisartoqarfiliornerit pillugit saqqummiussilluartarsimasut, tassunga ilanngullugu isornartorsiuisarsimasut. Sermitsiamit assersuutigalugu Nuummi timmisartoqarfissap inissisimaffissaa isornartorsiorneqangaatsiartarsimavoq. Tassa tigussaasunik tusagassiisoqartarsimaqaaq, Christian Schultz-Lorentzen oqarpoq, nangillunilu:

- Taamatut oqariarlunga oqaatigissavara, tusagassiivimmi killilimmik isumalluuteqartumi suliamik taamak annertutigisumik ilungersunartigisumillu qulaajaaniarnerup ajornarsinnaanera qularutigineqanngimmat. Taamak annertutigisumik qulaajaasoqassappat naammattunik sulisartariaqarpoq. Tassa tusagassiivimmi annertuumi tusagassiortut allamik suliaqaratik qulaajaanissamut suliakkinneqarsinnaapput. Tamannali uagut tusagassiivitsinni piviusorsiornerunngilaq.

Taamatut oqariarlunga oqaatigissavara, tusagassiivimmi killilimmik isumalluuteqartumi suliamik taamak annertutigisumik ilungersunartigisumillu qulaajaaniarnerup ajornarsinnaanera qularutigineqanngimmat, Christian Schultz-Lorentzen oqarpoq.

Birger Poppel naapertorlugu, kikkut tamat oqallinnerannut akuliussinnaaneq ajornakusoortarpoq, ilaatigut Tusagassiorfiup Sermitsiaq.AG-p politikkia malillugu, aviisimi allaatigisat atuartartulluunniit allaatigisaat kalaallisut imaluunniit danskisut kalaallisullu allassimasussaanerat pissutigalugu.

Tusagassiorfiup nutserinernut akiliuteqarnissaa ajornartorsiutaasoq

Allaaserinnittup allaaserisat danskisuumiit kalaallisuunngortillugit nutserneqarnerat nammineerluni akilertussaavaa.

Tassunga atatillugu Christian Schultz-Lorentzen imatut oqarpoq:

- Kalaallit Nunaanni pisortatigoortumik oqaatsit kalaallisut oqaasiupput. Danskisut oqaasiunatik. Nunami oqaatsit atorneqartut imaluunniit tusagassiorfimmi nutserisussaqarnerup killeqarnertarnera oqallissaarisartunit allaaserinnittartunillu eqqumaffigineqannginnera ataqqinninnginneruvoq. Piffissami sivisuumi ajornartorsiutaasimavoq, Kalaallit Nunaanni tusagassiorfimmit inuinnaat ilanngutassiaannik danskisuumiit kalaallisuumut nutserneqarnerisa akilerneqartarnissaannik naatsorsuutiginnittarneq, tassa ilanngutassiaq sumulluunniit attuumassuteqaraluarpat, taanna oqarpoq.

Pisortap oqaatigaa, Tusagassiorfimmi nutserisut tusagassiortut ilanngutassiaannik salliutitsillutik nutserisartussaasut.

Powered by Labrador CMS