Naalakkersuisut siulittaasorisimasaat Inuit Ataqatigiinnilu siulittaasuusimasoq Kuupik Kleist Tunngaviusumik inatsisissaq pillugu isumalioqatigiissitami siulittaasunngorpoq. Isumalioqatigiissitamut suliakkiissutit nalimmassarneqareerneranni siulittaasoq Naalakkersuisunit taarserneqarpoq.

Namminersorlutik Oqartussat taama tusagassiorfinnut nalunaaruteqarput.

Tunngaviusumik inatsisissaq pillugu isumalioqatigiissitap ilaasortassaanik partiinit innersuussisoqareersorlu Naalakkersuisut toqqaapput.

Kuupik Kleistip siulittaasunngorpoq. Siulittaasuusimasorlu Ineqi Kielsen siulittaasup tulliatut inissilluni.

- Maanna Tunngaviusumik inatsisissaq pillugu isumalioqatigiissitaq tunngaviusumik inatsisissatut siunnersuummik, Kalaallit Nunaannut namminersortumut atuuttussamik imaqartumik suliarinninnerminik inaarsaanermut killippoq, ilaasortanik nutaanik toqqaanermut atatillugu Naalakkersuisut Siulittaasut Múte B. Egede oqarpoq.

Tunngaviusumik inatsisissaq pillugu isumalioqatigiissitami ilaasortat ukuulerput:

• Siulittaasoq: Kuupik Kleist sinniisoralugu Marianne Jensen, IA
• Siulittaasup tullia: Ineqi Kielsen sinniisoralugu Amalie Bourup, S
• Ilaasortaq: Simigaq Heilmann sinniisoralugu Jens-Erik Kirkegaard, D
• Ilaasortaq: Mari Kleist sinniisoralugu Christian Jerimiassen, N

- Isumalioqatigiissitami ilaasortaasimasut sulinerannik qujassuteqarfigaakka, peqatigisaanillu nutaatut ilaasortanngortut tikilluaqqullugillu suliamut tassunga suleqataarusunnerannik qujassuteqarfigissavakka, neriuppungalu ilaasortat tamarmik piumassuseqarlutik, ilisimasatik atorlugit ataatsimoornermi peqataassasut, ataqqeqatigiillutillu isumalioqatigiissitap sulineranik siuarsaallutillu kivitsissasut, taamaalilluni suliap inernera, inuiannut kalaallinut Kalaallit Nunaatalu siunissaanut tunngavissiisinnaaqqullugu, Múte B. Egede oqarpoq.