Nuummi innaallagiamik pilersuineq tamakkiisunngoqqippoq
Nukissiorfinni sulisut innaallagiamut attaviit ajoquteqartut tallimanngornerup ingerlanerani aaqqissuullugit naammassivaat. Ajoquteqartoqarnerani Nuummi qulliit qamittaqattaarsimapput, maannali juullip ulloriaata ikumatinnissaa ernumagineqartariaaruppoq.
Utoqqarmiut Kangerluarsunnguini erngup nukiganik nukissiorfimmit attaviit akornusersimasut nassaarineqarneranit Nukissiorfimmi sulisut ulloq ataasiinnaap iluani aaqqissuusisinnaasimapput - utaqqiisaagallartumik.
- Immikkut ilisimasaqartugut oqaqqaaraluarput akornusersimasup aaqqissuunnissaa sapaatit akunneri arlallit suliarineqaratarsinnaasoq, suliaqarnissamut periarfissat kipiluttunarsinnaammata. Nukissiorfiilli Air Greenlandillu aaqqiissuulluakkamik suleqatigiinnerisa kinguneraat aaqqiigallarneq ullumikkut naammassineqarsinnaasoq, nukissiornermut pisortaq Kaspar Mondrup oqarpoq.
Nukissiorfinniit ulluni kingullerni kaammattuutigineqartaqattaarpoq innaallagiamik sipaarnissaq, erngup nukiganik nukissiorfiup innaallagiamik pilersuinnginnerata nalaani.
- Kaammattuutigisatta tusaaneqarsimanera malugilluarsinnaavarput. Illoqarfimmimi ingerlaaraanni juullip ilisarnaataa, tassa juullip ulloriaa sungaarujuttoq, Nuummi ikumanngitsoq maluginiarsinnaasimavarput, Nuummi innuttaasut tapersersuilluarsimanerannut qujarujuppugut, Kaspar Mondrup oqarpoq.
Kabelip aaqqissuunneqarnerani Nuuk upalungaarsimatinneqartutut inissisimajunnaarpoq, tassami innaallagialersuutaagallartoq maanna atorneqarunnaarmat. Innuttaasullu innaallagiamik atuinertik naliginnaasunngorteqqissinnaanngorpaat.
Nukissiorfiit qulakkeerinnipput arfininngornermi anorersuarpat qulliit qamittoornissaat ernumagineqartariaqanngitsoq.
Innaallagialersuigallartoq ajornartorsiortitsisoq
Ataasinngornermi unnukkut qulliit qamittoormata innaallagiamik pilersuilernissamut sivisungaatsiarnera pissuteqarpoq innaallagialersuutaagallartussap aallartinniarnera sivisusimammat.
Tassunga pissutaasut assigiinngillat, attaveqaatitigulli kipisoorneq tassunga ilaalluinnartoq, Nukissiorfiit ilisimatitsipput. Nukissiorfiup akerlilerpaa innaallagialersuutaagallartup misilittarneqartarsimannginnera akornutaatitsisimasinnaasoq.
- Innaallagialersuigallartussaq qaammatit tamaasa misilittarneqartarpoq, misilittaanerulli assigiinnanngilaa illoqarfimmik pilersuineq. Misileraaneq tamakkiisoq ingerlanneqassagaluarpat, tassa erngup nukiganit pilersuineq unitsillugu dieselitortumik innaallagiamik pilersuineq aallartissagaanni, tamanna qamittoornermik akunnerpassuarnik sivisussuseqartumik kinguneqartussaavoq, Kaspar Mondrup nassuiaavoq.
Sulisut nersualaarneqarput
Pisortap sulisuni nunattalu upalungaarsimanermik suliaqartui ajornartoornermi sulilluarsimanerat pillugu nersualaarpai.
- Pissutsit ilungersunarluinnarneranni Nukissiorfiit sulisui sulilluarsimapput. Unnuaarullutik sulipput innaallagiamik pilersuineq aallarteqqikkumallugu, Kaspar Mondrup oqarpoq.
- Ataasinngornermi unnukkulli sulillutik aallartinnerisa kinguneraat maanna pissutsinut nalinginnaasunut uteqqinnerput. Nukissiorfiit sulisui immikkuullarilluinnartumik naammassisaqarput - taakkoqanngippat innaallagiaqannginnerput sivisunerujussuusimasinnaagaluarpoq ajornerujussuarnillu atugaqarsimasinnaagaluarpugut. Sulinerannut qujassutissaqarpugut, Kaspar Mondrup naggasiivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...