Pipaluk K. Jørgensen filmiliornermi nersornaaserneqartoq

Film.gl-imi ilaasortat Kalaallit Nunaanni filmilianut nersornaasiuttakkamik Innersuaq 201-mik kina nersornaaserneqassanersoq toqqarsimavaat, ukiorlu manna nersornaat festivalertitsisarnermi pisortamut filmiliortartumullu Pipaluk K. Jørgensenimut tunniunneqarpoq.

Piviusulersaarusiortartoq Hanns M. Sørensen nersornaasiisuuvoq, taassumalu pingaartillugu oqaatigaa, Pipaluk K. Jørgensen kalaallit filmiliaannik nunallu inoqqaavisa filmiliaannik nunani tamalaani siuarsaalluni sulissuteqarsimasoq.

Pipaluk K. Jørgensenip aamma Nuuk Internatsional Film Festivalimi suleqatini peqatigalugit ukiuni arlaqartuni kalaallit filmiliaannik tapersersuillutillu siuarsaaqataasimapput. Filmiliortartoq aamma ingerlatseqatigiiffiutimini Polaramami suliaqartarnermini nersorneqarpoq:

- Peqatigitillugu Pipaluup Polarama aqqutigalugu Kalaalli Nunaanni filmiliortartut filmiliaritittartullu nunanit allaneersut Kalaallit Nunaanni filmiliorneranni pingaarutilittut inuttaatinneqartarnissaat sulissutigisimavaa. Tamatuma saniatigut Pipaluk Canadami Nunanilu Avannarlerni filmiliortartut arlallit suleqatigalugit kalaallit filmiliaannik takutitsisarnermigut eqqumaffiginnitsitsilersimavoq, Film.gl tusagassiorfinnut nalunaaruteqarluni allappoq.

Filmiliortartorpassuit nunaqavissut atorfinitsissimagai

Filmilortartullu nersornaaserneqarnini nuannaarutigaa:

- Nersornaammut qujanarujussuaq. Filmiliortartoqatinnit nersornaaserneqarnera nuannaarutigaara, pingaartumik Polaramami ukioq manna filmiliortartunik nunaqavissunik atorfinitsitsinikkut filmiliortarnerup qaffassarneqarnissaa sulissutigisimagakku, Pipaluk K. Jørgensen oqarpoq.

Nersornaasiinermi inuusaliaq 5.000 koruunillu tunniunneqarput.

Innersuaq ukioq manna novembarip 20-ani annikitsumik aaqqissuussisoqarneratigut tunniunneqarpoq, nersornaasiinerlu Nuummi coronap inissisimaneranit sunnerneqarsimavoq, killilersuutit pissutigalugit nersornaasiineq Facebookikkut toqqaannartumik aallakaatinneqarpoq, Film.gl ilisimatitsivoq.