Ullormut paasineqartut - tunillatsissimasut nutaat 21-t
Tunillatsissimasut nutaat 21-t, Ilulissani ataaseq Nuummilu 20, ippassaq marlunngornermi nalunaaqutaq 12.00 kingornamiit maannamut paasineqarsimapput. MIsissugassat Upernavimmeersut suli misissorneqanngillat.
Marlunngorneq 23. november nal. 12.00 kingornali tunillatsissimasut nutaat 21-t paasineqarsimapput. Ilulissani ataaseq Nuummilu 20-t.
Tunillatsissimasut nutaat ulluni kingullerni amerlalluinnartarsimasut, maanna ikinnerungaatsiarput.
Marlunngornermi tunillatsissimasut nutaat 104-t paasineqarput, taakkunani 81-t Upernavimmiittuullutik.
Nunatsinni tunillatsissimasut siullermeerlutik 300-t sinnerpaat.
Maanna tunillatseqqasut 301-iupput.
Kommune Kujalleq kisiartaalluni tunillatsissimasoqanngilaq.
Upernavimmiit akissutit suli utaqqineqartut
Nunatta nakorsaaneqarfia ilisimatitsivoq Upernavimmiit misissugassat akissutissaat suli utaqqineqartut.
- Upernavimmiit misissugassat suli akissutisineqanngillat. Misissugassat Nuummut nassiunneqarsimapput, silalli ajornera pissutigalugu silaannakkut angallannerit kinguaattoorfiummata misissugassat suli misissorneqanngillat, nunatta nakorsaaneqarfia ilisimatitsivoq.
Peqqinnissaqarfiup Upernavimmi innuttaasut tamarmik tunillatsissimanngikkunik tunillatsissimasunut qanillivallaarsimanissaat maanna nalilereerpaat.
Upernavimmi eqqaanilu tuniluunneq annertulluinnarpoq, taamaammat peqqinnissaqarfiup Upernavimmi periutsini allanngortippaa, misissuinerillu akiuussusersuinerillu annikillillugit.
