Ersinngitsumik innarluuteqartut: Immikkut suliniuteqartut ilinniarfinnut allanut siunnersuisalertut
Ilinniarnertuunngorniarfiit ilinniartunik ersinngitsumik innarluuteqartunik ilinniartuuteqarnerannut atatillugu immikkut suliniuteqartut siunnersuisarsinnaanerat ukiualunni misiliutaareersorlu, ilinniaqqiffinnut allanut siunnersuisoqarsinnaanera atuutsilerneqarpoq.
Ilinniaqqiffiit ersinngitsumik innarluuteqartumik ilinniartuuteqarunik, ilinniartitsineq tapersersuinerlu pillugit immikkut suliniuteqartunut siunnersortissinnaalerput. Tilioq nittartakkamini taama ilisimatitsivoq.
Ilinniartitaanermut naalakkersuisoqarfik ilinniarnertuunngorniarfimmi misiliutaasumik immikkut pisariaqartitsisut ilinniarnertuunngorniartissinnaanissaannut 2017-imi misiliummik aallartitsivoq. Ilinniartut innarluuteqarsinnaapput allatigulluunniit nappaateqartuusinnaallutik, nalinginnaasumik ilinniarnertuunngorniarnissaminnut periarfissagissaaratik. Ilinniartulli, angajoqqaajusullu kiisalu ilinniartitsisut ilinniarnerup nalaani immikkut suliniuteqartunit siunnersorneqarsinnaalerneratigut misiliut ingerlanneqarpoq.
Misiliut allanut atuutsilerneqarpoq
Ilinniartut immikkut pisariaqartitsisut ilinniarnertuunngorniarfimmi ilinniarsinnaanerannut misiliut ukiuni pingasuni tullerni ingerlaqqittussanngorpoq. Ilanngullugu ilinniaqqiffiit allat kiisalu Majoriaq misiliummi ilanngunneqartut, immikkut suliniuteqartut ilisimatitsipput.
- mmikkut suliniuteqartut anguniartussaavaat, GUX S-mut illinniarniarlutik qinnuteqartut innersuunnissaat, aamma saniatigut ilinniartumut attaveqartussat ilinniartitsisut mentor-illu ilinniarteqqinnissai.
- Immikkut suliniuteqartut ilinniarnertuunngorniarfiit immikkut atuarnissamik aaqqissuineranut siunnersuisarput, immikkut pisariaqartitsineq aallaavigalugu aaqqissuinissaq eqqarsaatigalugu, immikkut suliniuteqartut allapput.
Siunnersuineq taanna ilinniarnertuunngorniarfinnut atuinnarani ilinniaqqiffinnut allanut aamma atulertussanngorpoq.
Tapersersuineq pisariaqarpoq
Ilinniartut immikkut pisariaqartitsisut, soorlu autismeqartut, Aspergers Syndromeqartut, ADHD-qartut naqinnernilluunniit ilisarsisinnaanngitsuusut, ilinniarnerminni immikkut tapersersorneqarnissamik pisariaqartitsipput. Ilinniartitaanermut naalakkersuisoqarfiup nalilerpaa immikkut suliniuteqartut ilinniaqqiffinnut siunnersuisarnerat pisariaqartuusoq:
- Suleqatigiinnissaq pisariaqartutut isigineqarpoq ataqatigiissaarissagaanni, soorlu isumaginnittoqarfimmiit ikiorsiissutiniit ilinniagaqarnersiuteqalernissaq anguniarlugu imaluunniit paarlaatumik, immaqa ineqarnermik allannguutit pillugit, immaqa atuagarsoreernerup kingunerisaanik ilinniarnermut atatillugu suliffimmut nikinneq imalunniit paarlaattumik.