Jens Napaattuumik suliaq taamaatiinnarneqartoq: Sioorasaarinerit nakuusernerilluunniit pineqarsimanngillat

Politikerip Naleqqameersup nakuusersimasutut sioorasaarisimasutulluunniit unnerluutiginissaanut tunngavissaqanngitsoq, politiit paasissutissiipput. Taamaattumik nakuusernermut sioorasaaarinermulluunniit assingusumik pisoqarsimagunarnera pillugu Siumup Napaattuumik nalunaarutiginnissimaneranik paasiniaaneq unitsinneqarsimavoq.

- Tamanna tupaallaatiginngilara. Taamatut inerneqarnissaa ilisimajuaannarsimavara.

Taama Inatsisartunut ilaasortaq, Jens Napaattooq (N), politiit nalunaarutiginninnermik, politikerip parteerisimasaata Siumup ukioq manna apriilimi suliassiissutigisimasaanik, unitsitsisimanerannik nutaarsiassamut atatillugu oqarpoq.

Aviisi AG taama allappoq.

Nalunaarutiginninneq pivoq Napaattuup inooqataatalu akornanni unnuakkut qassiiliortoqarneranik, meeqqap akuuffigisaanik, facebookimi videoliaq ingerlaartinneqareersorlu.

Napaattooq AG-mut nassuiaalluni oqarpoq, suliaq tamarmik nammineq isimini paatsuuisimanermik tunngaveqartoq. Imersimanini meeqqamillu najuuttoqarnerani oqalussimanini akuersaarpaa. Kisianni inuppassuit, aamma tusagassiuutit, taassuminnga nittarsaassimasut, facebookimi takutitaq tusaamasaasoq takusimanngilaalluunniit.

Tusarsimasaminnut qisuariarsimapput, Jens Napaattooq, taamani Inatsisartunit napparsimalluni sulinngiffeqalersoq aappanilu peqatigalugu ilaqutariittut katsorsartilersoq, naapertorlugu.

Unnerluussisussaatitaasup suliaq sooq taamaatiinnarneraa aviisimi AG-mi atuarsinnaavat. Aviisi uani pissarsiariuk:

Powered by Labrador CMS