Tunillatsittut nutaat 26-t - aaqqissuussami arlallit peqataasimapput
Tunillatsissimasut nutaat 26-it illoqarfinni katillugit tallimaasuni paasineqarput. Nuummi tunillatsissimasut amerlanerupput.
Ataasinngornermi nalunaaqutaq 12.30 kisitsisit nutarterneranniit maannamut tunillatsissimasut nutaat 26-t paasineqarsimapput.
Tunillatsissimasut nutaat illoqarfinni tallimaasuni, kommunini tamaniittuniittut, nunatta nakorsaaneqarfiata paasititsissutigaa. Tunillatsissimasut Nuummiittut amerlaneroqqipput.
- Ilulissani tunillatsittut nutaat marluk
- Aasianni tunillatsittoq nutaaq ataaseq
- Sisimiuni tunillatsittut nutaat tallimat
- Nuummi tunillatsittut nutaat 17-it
- Qaqortumi tunillatsittoq nutaaq ataaseq
- Tunillatsissimasuni nutaani arlaqartoq aaqqissuussami ataatsimi peqataasimapput, tassanilu tuniluuttoqarsimalluni. Aaqqissuussaq kommuninit tamanit peqataaffigineqarpoq. Peqataasut najukkaminnut tikereernerminni tunillatsissimallutik paasisimavaat, nunatta nakorsaaneqarfia ilisimatitsivoq.
Angalasimasut misissorteqquneqarput
Aaqqissuussami peqataasimasoq ataaseq Danmarkimut tikereernermini tunillatsissimalluni paasivaa. Angalasut GL 542-mut 22. oktober 2021 Nuummiit Kangerlussuarmut ilaasimasut ersiutinut eqqummaarilluarnissaannik misissortinnissaannillu kaammattorneqarput.
Angalasoq alla GL 415 ilaaffigalugu ippassaq 25. oktober 2021 Nuummiit Narsarsuarmut angalavoq. Tassani ilaasut ersiutinut eqqummaarilluarnissaannik misissortinnissamillu aamma kaammattorneqartut, ilisimatitsissutigineqarpoq.
- Aaqqissuussamut tunngatillugu tunillaassuuttoqannginnissaannut iliuusissat pisariaqartut aallartinneqareerput, nunatta nakorsaanera allappoq.
Ilanngullugu ilisimatitsissutigineqaqqippoq Nuummi Sisimiunilu illoqarfimmi sumiluunniit tuniluuttoqartoq. Tunillatsinnermut ersiuteqartut tamarmik misissortinnissaat imminnullu mattunnissaat kaammattuutigineqaqqippoq.
