Ungkaq Rasmus Lyberthinngorpoq
Rasmus Lyberth inuunermini aqqusaagaqartarsimaqaaq, maannalu utoqqasaanngornermini nutaamik nuannarisavissuaqalersimavoq: qalipaaneq. Tamanna erinarsornermit samminerulerniarpaa, misigisimagami erinarsorneq aalluppallaalersimallugu.
Rasmus Lyberth. Angutip nunarsuarmi tusaamasap inuunera aviisimi quppernerit sisamaannaat atorlugit qanoq oqaluttuarineqarsinnaava? Angut, kalaallit tamarmik ilisarisimallugu misigisimaffigisaat. Aap, apersoraanni pitsaanerussaaq. Aviisi AG allappoq.
70-inik ukiulik Rasmus Lyberth piffissami matumani isiginnaagassiaq Tarnima Nammatai angallallugu nuna tamakkerlugu angalavoq, sapaatilli akunnialui matuma siornatigut illoqarfimmiippoq DR-imi nangeqattaartuliamut Borgenimut filmiliaritikkiartorluni. Rasmus ullumikkut Odensemi najugaqarpoq, ukiunilu kingullerni 15-ini tassani najugaqarsimavoq.
DR-imi nangeqattaartuliami nunanut allanut tunngasunut politikeritut inuttaasussaasimagaluarpoq, aalajangerneqarsimavorli taanna inuusunnerusumik inuttaqassasoq. DR-illi Rasmus Lyberth taamaatiinnarusussimanngilaa, taamaattumik piniartutut Josvatut inuttaaffissaanik mikinerusumik allapput. Imaluunniit…inuttaaffik mikisunnguusussaasimagaluarpoq, kingornali annertusineqarpoq, taamaattumik Kalaallit Nunaannukaqqissimavoq filmiliaritikkiartorluni.
- Ukioq manna suliassaaleqinngeqaanga. Tupinnaqaaq taama utoqqasaanngoreertigalunga suli aggersarneqartarama, taanna oqarpoq.
Allaaserisaq tamaat uani AG-mi pisiarisinnaasanni atuaruk: