Timmissap ataatsip Norsaq nunamiitikkaa

Air Greenlandi timmisartumik allamik Kastrupip Kangerlussuullu akornanni ingerlaartussamk attartorsimavoq, sapaatiummat timmissamit "aportissimanermi" kingorna.

Air Greenlandip atlantikoq qulaallugu ingerlaarfissaanut bilitsisisartut amerlalluinnarnerisa nalaanni ingerlatseqatigiiffik timmisartumik allamik attartortariaqarsimavoq.

Atlantikoq qulaallugu timmisartorineqartartoq Norsaq ingerlaarnermini timmissamit aporineqariasaarsimavoq.

- Norsaq timmissamit ajoquserneqarsimavoq, sapaatiummat timmisartup ingerlaarnerani timmissap ataatsip timmisartup suluata aappaa aporsimavaa. Tamatuma ataasinngornermi marlunngornermilu timmisartuussinissat sunnersimavai, taamaammat Norsap misissorneqarnerani ulluni taakkunani timisartuussinissamut timmisartumik allamik attartorsimavugut, Air Greenlandimi attaveqartarnermut sulisoq Katja Vahl Sermitsiaq.AG-mut ilisimatitsivoq.

Norsarli ullumi ingerlaaqqilereerpoq, taamalu nalinginnaasumik ingerlaqqilerluni.

Bilitsit qangatut pisiaalluartut

Air Greenlandimi bilitsinik tunisaqarsimaneq 2019-imi oktobarip, novembarip decembarillu qaammataanisulli annertutigilersimavoq. Siorna bilitsit tunineqarsimasut corona pissutigalugu matusisoqartarsimanerani annikinnerusimapput.

- Angalarusussuseqarluartoq aamma nittartakkatsinni Nunattalu Angalatitsiviani suliaqarluartoqartoq maannakkorpiaq malugaarput, Katja Vahl ilisimatitsivoq, kaammattuutigalugulu piffissaagallartillugu pilersaarusiortoqartassasoq:

- Suli inissaateqarpugut, angalasoqarluaqqilersimavorli, taamaammat inuit Atlantikoq qulaallugu angalanissamik pilersaaruteqarunik piffissaalluartillugu bilitsisisarnissaannik kammattorumavavut, taanna oqarpoq.

Powered by Labrador CMS