Asii Berthelsen Tyrkiemut unamminermi marlunnik isertitsivoq
Kalaaleq inuusuttoq Danmarkimi nunanut allanut unammisartuni U19-ini arsartartoq, Asii Berthelsen Tyrkiemut unamminermi marloriarluni isertitsivoq. Danmark EM-imut anngunniunnermi Tyrkiemut pingasunngormat unammivoq.
Isikkamik arsarnermi U19-ini nunanut allanut unammisartut EM-imut anngunniunnerat Danmarkimi ingerlanneqaleruttorpoq. Asii Berthelsen Danmarkip Tyrkiemut unammeqqaarnerani arsaqataavoq. Unammineq Østerbro Stationimi pingasunngormat nalunaaqutaq 18.00 (danskit nalunaaqutaat malillugu) aallartinneqarpoq.
Asii Berthelsen dommerip unammineq naammassiniarlugu sigganngilaataanni marlunnik isertitsivoq. Taamaalilluni Danmark Tyrkiemut 6-0-imik ajugaalluni. Kalaaleq isikkamik arsartartoq unamminerup allartinnerani arsaqataanngilaq. 69 minuttit arsartoqareersoq arsaattarfimmut isertinneqarpoq.
Isertitsinerit siulliit Nikoline Dudek-imit, Sarah Thygesenimit isertinneqarput. Allallut marluk Malou Marcetto-mit isertinneqarlutik.
Danmarkimi nunanut allanut unammisartut arfininngormat nalunaaqutaq 14.00 Ungarn-imut unammissapput, Hvidovre Stadionimi. Marlunngorpallu oktobarip 26-ani Finlandimut unammissallutik.
Danmark aamma Finland maanna 3 pointinik katersisimalerput. Ungarn aamma Tyrkiet suli pointeqanngillat.
Unamminerit uani malinnaaffigisinnaavatit.