Tunillatsittut nutaat 16-it - Ilulissani tunillatsittoqaqqittoq
Tunillatsittut nutaat 16-it ulloq unnuallu ataatsip ingerlanerani paasineqarput. Taakkunani marluk Ilulissani paasineqarput.
Nuummi inuiaqatigiinni suli tunillaassuuttoqarpoq, tunillatsissimasunut qanigisaanngitsut tunillatsittarneri paasineqartarmata.
Illoqarfinni pingasuni katillugit 16-it tunillatsissimasut ulloq unnuarlu ataatsip ingerlanerani paasineqarsimasut, nunatta nakorsaaneqarfia nittartakkamini ilisimatitsivoq.
Nuummi qulit, Sisimiuni sisamat kiisalu Ilulissani marluk tunillatsissimapput. Misissugassat katillugit 463-it misissorneqarsimapput.
- Tunillatsissimasuni nutaani tunillatsissimasunut allanut attaveqartuunngitsunik suli paasisaqartoqartarpoq. Meeqqat atuarfiinili meeqqerivinnilu qanillivallaarsimasut tunillatsissimasartut aamma paasineqartarput. Illoqarfimmi tamarmi tunillaassuuttoqarsinnaanera aarlerinaateqarpoq, nunatta nakorsaaneqarfia tunillatsissimasut nutaat pillugit paasissutissiinermini ilisimatitsivoq.
Illoqarfimmi tunillaassuunneq itigartivinneqarsinnaanngitsoq
Sisimiuni meeqqat atuarfiini suli tunillaassuuttoqartoq, ilisimatitsissutigineqarpoq.
Ilulissani tunillatsissimasut nunanut allanut angalasimanerminni tunillatsissimasinnaasutut nalilerneqaraluartut, taamaattoq illoqarfimmi tunillaassuuttoqarsinnaanera itigartivinneqanngilaq.
- Ilulissani tunillatsissimasut marluk nunanut allanut angalanerminni tunillatsissimasinnaagaluartut, taamaattoq illoqarfiup iluani tunillaassuunneq itigartivinneqarsinaanngilaq, ilisimatitsissutigineqarpoq.
