Kinguaassiuutitigut atornerluinernut pineqaatissiissutit illarnaannartut

Pinngitsaaliilluni arnerinerit pillugit nalunaarutiginninnerit aatsaat taama amerlatigisut Tamakkua ilarpassuini meeqqat inuusuttullu eqqugaasarput. Pineqaatissiinerit 50 procentinik – imaluunniit 500 procentinik sakkortuninngortinneqassanersut politikerinit maanna oqaluuserineqalerpoq.

Pinerlussimasup pinerlineqarsimasullu naapinnissaannik pitsaaliueriaaseq tassaasinnaavoq, sinerissami pineqaatissinneqartut Nuummi pinerluuteqarsimasunut inissiisarfimmut inissinneqartarnissaat.

Pinerliisut meeqqanik inuusuttunillu pinngitsaaliillutik atoqatiginnittartut pineqaatissinneqartarnerat pineqartillugu inuiaqatigiit sakkortunerujussuarmik pineqaatissiisariaqarput.

Tamanna Inatsisartuni politikerit isumaqatigiissutigigaat, aviisi AG allappoq.

Taakkua ilaannit arlalinnit, pineqaatissiissummik atuinissamut utaqqisoqartarnera pissutigalugu pinerlineqartut pinerliisumik pinerlunnerup kingorna naapitseratarsinnaasarnerisa ajorluinnartuunera uparuarneqarpoq.

– Pinerlineqarsimavoq inuunermi sinneranut aserorneqarsimasinnaavoq. Sulianik pineqaatissinneqartut pinerluuteqarsimasunut inissiisarfimmut isertinneqarnissaminut ukiunik utaqqisariaqartarsimanera pissutigalugu pinerlineqarsimasup pineqaatissinneqarsimasumik naapitaqarfigisariaqartagaanik pisoqartarsimanera misigisarsimavara. Pinerlineqartup pinerluusimik naapitaqaratarsnnaasarnera ajornartorsiuterujussuuvoq, Jens Naapaatooq Inatsisartuni oqallittoqarnerani oqarpoq.

Siumumeersup Anders Olsen saqqummiussinermini oqaatigaa, pineqaatissiinerit sivikippallaat kingunerisaannik pinerlineqarsimasut pinerluttumik pilertortumik naapitaqaqqissinnaasartut.

- Maannamut pineqaatisseeriaaseq qiviaraanni kukkuneruallaasanngilaq oqarutta pinerluuteqarsimasoq pinerlineqarsimasorlu piffissap sivikitsuinnaap qaangiunnerani nunaqarfimminni illoqarfimminniluunniit inooqatigeeqqilersarmata, oqarpoq.

Anders Olsenip meeqqat kinguaassiuutitigut saassunneqartarnerat alianarluinnartuusutut oqaatigaa, allaallu immikkut ittumik suliniutit malunnaatilimmik angusaqarfiusimannginnerarlugit.

Aviisimi AG-mi allaaserisaq tamakkerlugu atuarsinnaavat. Aviisi uani pissarsiariuk:

Powered by Labrador CMS