Borgmesterip Neqip amigartooruteqarnera annilaarutigigaa: Ilaqutariit angerlarsimaffitik annaasinnaavaat

Nunami toqoraaviit annersaat Neqi A/S 30 millioner koruuningajalluinnarnik amigartooruteqarpoq. Sapaatip akunnerata siuliani ataatsimeersuartoqarmat tamanna saqqummiunneqarpoq. Kommuni Kujallermi borgmesterip ernummatigaa, piginnittut suliffissuarmik matusissappata, Narsami innuttaasunut savaatilinnullu matusinerup kingunerluuteqarsinnaanera.

Stine Egedep Neqi A/S-imi amigartooruteqangaatsiartoqarsimanera annilaarutigaa. Toqoraavimmi qanittukkut savanik tuusintilikkaanik toqoraaffiusussami nammineq aningaasaatit 6,8 millioner koruuninik sinneqartooruteqarnissaq naatsorsuutigineqarsimagaluarpoq. Tallimanngornermili oktobarip arfineq-pingajuanni ataatsimeersuartoqarmat saqqummiunneqarpoq, suliffeqarfik 30 millioner koruuninik amigartooruteqarsimasoq.

- Tamanna kingunerluuteqangaatsiarsinnaavoq. Akileraarutitigut isertitassat annaasinnaavagut ilaqutariillu eqqugaasinnaallutik. Amigartooruteqartoqarnera assut ernumarnarpoq. Tamanna nassuerutigisariaqarpara, borgmesteri Stine Egede (IA) Sermitsiaq,AG-mut oqarpoq.

Toqoraaviulli matuneqarnissaanik maannakkorpiaq pilersaaruteqartoqanngilaq.

Suliffeqarfik amigartooruteqarujussuarnermi saniatigut ukiumut angusatigut 17,1 millioner koruuninik amigartooruteqarpoq. Taamaammat Neqi A/S-ip nammineq aningaasaatini nammineerluni iluarseqqissinnaassanngikkai nalilerneqarpoq. Ataatsimeersuartoqarnerani aalajangiunneqarpoq, Neqi A/S-ip aningaasaliiffigineqarnissaata imaluunniit kiffartuussinissamik isumaqatigiissuteqarnerulernissaata tungaanut KNI A/S-imit aningaasatigut ikiorserneqassasoq.

Allanik suliffissaqanngitsoq

Neqi A/S-imi toqoraasoqarnerata nalaani inuit 80-it missaanniittut sulisorineqartarput, sulisullu 25-t ukioq naallugu sulisorineqartarlutik.

- Toqoraavik kommunimut Narsamilu innuttaasunut pingaaruteqarluinnartuuvoq. Suliffeqarfik matuneqassappat, sulisut suliffissaminnik allamik imaaliinnaq pissarsisinnaanngillat. Tamatuma kinguneranik inuit ineqarnerminnut akissaarutissapput, kommunilu isumaginninnikkut akiliuteqarnerusalissalluni, Stine Egede (IA) oqarpoq.

Narsami sulisut saniatigut, savaatillit aamma sakkortuumik eqqorneqassapput.

- Piginnittut suliffeqarfimmit matusinissaat upperinngilara. Piginnittut toqoraaviup ingerlaannarnissaanik aalajangissagut upperaara, Kujataanimi savatilippassuit pineqarmata. Piginnittut aamma toqoraaviup matuneqarnissaanik aalajangissagunik aningaasanik suli amerlanerusunik annaasaqartussaapput, borgmesteri naggasiivoq.

Neqi A/S 2013-imi 60 millioner koruunit nalingannut nutarterneqarpoq, ullumilu toqoraavittut nutaaliaasutut EU-mit akuerisaalluni.

Powered by Labrador CMS