Tujorminaqisumik nassaartoqareersoq: Politiit siusinnerusukkut suliaasimasunik misissuisut

Politiit Ilulissani eqqakkanut ikuallaavimmi inuup timaata ilaanik nassaartoqareersoq, inuit maqaasineqartut pillugit suliaasimasunik misissuilersimapput.

Ilulissat eqqakkanut ikuallaavianni arfininngormat tujorminaqisumik nassaartoqarpoq.

Sulisup ataatsip eqqakkat ikuallaavimmut ingerlaartinneqartut akornanni inuup timaata ilaa nassaarivaa.

Politiit sulisup sunarpiaq nassaarisimaneraa oqaatigerusunngilaat, politiinspektørilli Gedion Quistip sapaatiummat Sermitsiaq.AG-mut oqaatigaa, timip ilaa nassaarineqarsimaoq meeraanngitsoq oqaatigineqarsinnaasoq.

Journalit misissorneqartut

Inersimasup timaa pineqarpoq, politiilli nassaarineqartoq angutaanersoq arnaanersorluunniit ilisimanngilaat. Suliaq toqutsisoqarsimasutut misissuiffigineqarpoq.

Gedion Quistip tassunga atatillugu ilisimatitsissutigaa, nassaarineqartoq sulianut allanut attuumassuteqarsinnaanersoq paasiniarlugu, inuit maqaasineqartut pillugi suliat politiinit misissuiffigineqartut.

Politiit ataasinngornermi ullup-qeqqata siornatigut Sermitsiaq.AG-mut ilisimatitsissutigaat, nassaarineqartoq kinaanersoq paasisaaqarfigisimanagu, misissuinerli suli ingerlanneqartoq.

Politiit suli ilisimannittussarsiorput, imaasinnaasoq ilaqutaasut ilisarisimasalluunniit arlaannik maqaasisaqartoqartoq. Ilulissanimi qanittukkut inunnik maqaasisaqartoqarneranik nalunaaruteqartoqarsimanngilaq. Politiit neriuutigaat, Danmarkimit ikiorsiiartortut ataasinngornermi Ilulissanut tikissinnaassasut.

Kommuni pisoqatigiittoqarnissaanik aaqqissuussisimasoq

Alianartumik pisoqarnerani borgmesterip innuttaasut unnugu nal. 19.00 kommunip allaffeqarfissuata silataani katersuutsinniarpai, tassanngaanniillu timersortarfiup akianut arsaattarfitoqqap tungaanut ingerlaaqatigiittoqassaaq, tamaanilu innuttaasut naneruutinik ikitsissapput.

- Pingaaruteqarpoq taamaattumik pisoqartillugu tapersersoqatigiilluta immitsinnut ikioqatigiinnissarput aammalu eqqugaasunut innuttaasunullu misiginneqatigiinnissarput, Palle Jerimiassen tusagassiorfinnut nalunaaruteqarnermi oqarpoq.

Powered by Labrador CMS