Naleraq: Akitsuutip atorunnaarsinneqarnissaa avaqqunneqarsinnaanngitsumik piumasaqaataavoq
Partii naalakkersuisooqataasoq Naleraq naalakkersuisooqatigiit suliaanni arlalitsigut naammaginninngilaq.
IA Naalakkersuisuni pissaaneqartippaa, taamaammat sineriammut qanittumi qaleralinniarnermut akitsuutip atorunnaarsinneqarnissaa avaqqunneqarsinnaanngitsumik piumasaraa
Naleqqap oqaaseqartartua Jens Napaattooq marlunngornermi aningaasanut inatsisissaq oqaluuserineqarmat taamatut nalunaaruteqarpoq:
- Akitsuut Nunatta Karsianut 16 millioner koruuninik isertitsissutaasarpoq, akitsuutillu atorunnaarsinneqarnissaa piumasaraarput. Tamanna avaqqunneqarsinnaanngitsumik piumasaqaataavoq.
- Akitsuut atorunnaarsinneqassaaq. Tassunga atatillug partiini allanit ataqqineqassaagut. IA-p partiia naalakkersuisooqatigiinni pissaaneqartipparput, Jens Napaattooq oqarpoq.
Asii: Naalakkersuisooqatigiinnissamik isumaqatigiissummi allassimanngilaq
Taamaalilluni sakkortuumik isumaqatiginninniartoqarniarpasippoq, Aningaasaqarnermummi Naalakkersuisup Asii Chemnitz Narupip (IA) akitsuummut isumaqataanini oqaatiginikuuaa.
Aningaasaqarnermut Naalakkersuisup Sermitsiaq.AG-mit apersorneqarami oqaatiginikuuaa, Naalakkersuisut ataatsimoorlutik aningaasanut inatsisissatut siunnersuutaanni imaluunniit naalakkersuisooqatigiinnissamik isumaqatigiissummi, Naleqqap IA-llu apriilip qaammataani isumaqatigiissutigineqartumi, akitsuup atorunnaarsinneqarnissaanik pilersaaruteqarneq allassimanngitsoq.
- Naalakkersuisut ataatsimoorlutik aningaasanut inatsisissatut siunnersuutaat tamatta tapersissagipput naatsorsuutigaara. Naleqqamit oqariartuutigineqartoq tusaavara, taamaammat soorunami aningaasanut inatsisissat inissinneqartussanngorpat isumaqatiginninniutigineqassaaq. Tusagassiorfiit aqqutigalugut isumaqatiginninniassanngilanga, Asii Chemnitz Narup Sermitsiaq.Ag-mut taamanikkut oqarpoq.
Ineqarnermut akiliutit qaffanneqarnerat aamma naammagittaalliuutigineqartoq
Qaleralinnut akitsuut Jens Napaattuup Naleqqap naalakkersuisooqataafigisaani sulianut atatillugu kisiat isornartorsiunngilaa.
Jens Napaattuup oqaluttarfimmiit Namminersorlutik Oqartussat inissiaataanni ineqarnermut akiliutit qaffanneqarnissaannik Naalakkersuisut ataasinngornermi nalunaarutaat aamma akerlilerpaa.
- Ineqarnermut akiliutit qaffanneqarissaat inissaminiinngilaq. Ineqarnermut akiliutit qaffanneqarnissaannik aalajangiinermi partiit allat peqataatinneqarsimannginnerat eqqumiippoq, Jens Napaattooq oqarpoq.
Naalakkersuisut Namminersorlutik Oqartussat inissiaateqarfiinit 16-iusunit arfineq-marlunni ineqarnermut akiliutigineqartartut qaffanneqarnissaat nalunaarutigisimavaat. Naalakkersuisut naapertorlugit, ineqarnermut akiliutit qaffanneqarniarput inissiat iluarsaanneqartariaqalivissimasut akissaqartinniarlugit.
- Inatsimmi erseqqilluinnartumik allassimavoq, inissiaateqarfiit amigartoorfiussanngitsut, tassa aningaasartuutit isertitanut naapertuutsinneqartussaammata, Ineqarnermut Naalakkersuisoq Naaja Nathanielsen ineqarnermut akiliutit qaffanneqarnissaat pillugu ataasinngornermi oqarpoq.