Aatsitassarsioqatigiiffik nutaaq Tunumi saffiugassanik misissueqqissaarisoq
Canadamiut aatsitassarsioqatigiiffiata Tasiilap Ittoqqortoormiillu akornanni Sødalenip eqqaani sumiiffimmut misissueqqissaarinissamut akuersissut pigilersimavaa. Aatsitassarsioqatigiiffik Xploration Services suleqatigalugu qillerinissamik pilersaarutit annertuut immikkoortuannik siullermik naammassinneqqammerpoq.
Aatsitassarsioqatigiiffiup Canadamit aallaaveqaartup Major Precious Metalsip Skaergaard-projektimut Tasiilap Ittoqqortoormiillu akornanniittumut misissueqqissaarinissamut akuersissut ukioq kingulleq Platina Resourcesimit pissarsiarisimavaa.
Aviisi Sermitsiaq taama allappoq.
Aasaq manna Kalaallit Nunaanni assartuinermik suliffeqarfik Xploration Services aatsitassarsiorfissap ineqarfissaanut atortussanillu Nuummiit Tasiilamut umiarsuakkut assartuivoq. Qillerineq Forage Fusion Drilling Ltd.-ip ingerlappaa. Tamanna Xploration Servicesip pisortaata, Martin Sandy Shalmip, Sermitsiamut uppernarsarpaa.
– Juulip aallartinneraniilli Sødalenip, Skærgårdenip aamma Miki Fjordip eqqaanni sumiiffissimavugut Major Precious Metals Corp. Sullillugu. Sapaatip-akunnerani matumani marlunngornermi Nuummut uteqqammerpugut, Martin Sandy Shalmi oqaluttuarpoq.
Aatsitassarsiorfissami inuit 54-it suliaqarsimapput. Taakkunani Tasiilami Nuummilu najugaqavissut amerlanerullutik.
– Suliniummi ataatsimi najugaqavissut aatsaat taama amerlatigisut ataatsikkut sulisoraagut. Ingerlalluarpoq, inuusuttullu qillerisunik ikiuuttut iluaqutigilluarsimavagut, Martin Sandy Shalmi Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: