Lars-Emil 75-inik ukioqalerpoq: Politikki initujuaannassaaq

Politikeri nuannarineqarluartoq nuannarineqarpallaanngitsorlu Nunatta nunasiaataaneraniit namminersornerup tungaanut ineriartortitseqataasimasoq ullumikkut 75-inik ukioqalerpoq. Inuuissiortup Inatsisartut ataatsimiittarfianut angerlarsinngilaq, qarasaali politikkimik eqqarsartuassasoq, Lars-Emil Johansenip Sermitsiaq.AG-mut oqaluttuaraa.

Nunatta namminersulernissaanut ukiut 50-it sinnerlugit suliniuteqarsimasoq ullumikkut 75-inik ukioqalerpoq.

- 1971-imi politikkimi suliaqalerninniit suleqataaffippassuakka kingumut isigalugit misigisimavunga pissutissaqarlunga tulluusimaasallunga. 1971-imi politikkerinngoratta 1979-imi namminersornerulerneq anguarput. Kommissionimi ilaasortaaffigaara taavalu aamma folketingimi inatsisiliunneqalermat aamma folketingemi ilaasortaallunga, inuuissiortoq Lars-Emil Johansen oqarpoq.

Taanna ullumikkut peqqittuunini qujamasuutigalugu inuuimmini nuannaarutiginiarpaa. Ajoraluartumillu unnugu nereqateqarnissani kinguartittariaqarsimavaa Nuummi coronap tuniluunera pissutaalluni.

Isumaqatiginninniarnerit sakkortuut isummallu assigiinngitsut

Lars-Emil Johansenip ilaatigut Den Kongelige Grønlnadsk Handel (KGH) nunatta nammineq pigilernissaanut sorsuuteqarpoq Kalaallit Nunaanut EU-miit (EF) aninissaa aamma sulissutigisimallugu.

- KGH-ip piginneqatigiiffinngornissaat sulissutigisimavara. Ullumikkut Royal Arctic Linemik, Royal Greenlandimik, KNI-mik aamma Tele-postimik ateqarput. Tamakkua tamarmik aktieselskabinngorlutik ingerlanneqalerat uanga nammineq pingaartillugu suleqataaffigisimavara. Soorlu aamma EF-imi ilaasortaajunnaarnissaq eqqarsaatigalugu suleqataasimavunga. Anisa-mi siulittaasuusimagama. Taanna assorsuaq assortuussutaasimavoq oqallisaaqqalunilu. 80’ikkunni oqallisigineqartuni sakkortunersaraat taanna, Lars-Emil Johansen oqarpoq.

Lars-Emil Johansen arlaleriarluni inuiaqatigiit akornanni annertuumik oqallisaasarpoq. Inuiaqatigiillu eqqarsaatigalugit ajunngitsumik anguniagaqartutut misigisimagaanni taava oqallinnerit qaangerneqarsinnaasartut poltikeriusimasup oqaatigaa.

- Eqqortumik ilioraanni aalajangiussimallugulu taava aalajangiussaq attatiinnarneqassaaq. Soorunami ilaannikkut kukkussutit isumaqatigiinngissutit naaperiaassutigineqartariaqartarput, taannalu pingaartorujussuuvoq. Suna tamarmi isuma malillugu aaqqissuunneqarsinnaaneq ajorpoq, demokratiimi inuugatta. Taamaattumik isumannik naapitseriaaneq aamma immikkut piginnaasaqarfigisimallugu misigisimavunga.

Politikki aavaniippoq

Lars-Emil Johansen Illorsuarni maanna Karrat Kangerluani qaqqap sisooriaanaap navianartorsiortitsinerani inuerutinneqarnikumi inunngorpoq. Nunaqarfik inuerutinneqanngitsuuppat taavunga inuuissioriarssagaluarluni taassuma oqaatigaa.

1991-imiit 1997-imut Naalakkersuisuni suliuttaasuuvoq, tassani ilaatigut pissaanermik atornerluisutut qanigisarsiortutullu pisuutinneqartarsimavoq. Taassuma nalaani imigassamik atornerluineq aamma Lars-Emil Johansenip atugaraa.

- Inuunera immikkoortortanut pingasunut immikkoortiteraanni ukiut 25-t siulliit meeraavunga, inuusuttuaraavunga, ilinniatuuvunga, ilinniartitsisunngorpunga. Ukiut tulliuttut 25-ingajaat sakkortuunik akisussaaffinnik angisuunik tigummiaqarpunga. Taavalu aamma ukiut ingerlaneranni sakkortusisiartortumik imigassamik atuillunga. Kisianni ukiut 25-t kingulliit aamma politikkimi suliaqarsimavunga imigassartaqanngitsumik, Lars-Emil Johansen oqarpoq.

Lars-Emil Johansenip ilaqutaani siullersaalluni politikeriunngilaq. Arnaa Elisabeth Johansen arnani siullersaalluni Grønlands Landsråd-imi qinigaavoq. Lars-Emil Johansenillu aataa, Johan Henningsen politikkimi aamma soqutigisaqarsimavoq. Taanna Grønlands Landsråd 1911-mi pilersinneqamat landsrådimi ilaasortaalerpoq,

Taamani avannaani kujataaniillu immikkut landsrådimut ilaasortaatitaqartoqarpoq.

- Eqaatsumik pissuseqarnissaq. Aqqut ataasinnaq atornagu aamma inuiaat sapinngisamik amerlanerit piumasaat najoqqutaralugit ingerlatsinissaq, taanna pingaartorujussuuvoq. Isumaqatiginninniarsinnnaasariaqarpoq isummallu inissaqartillugit. Eqaatsumik periarfissaqarsinnaaneq illuatungaanaa pinnagu, kisianni aamma illuatungaaniittut aamma eqqarsaatigalugit, Lars-Emil Johansen naggasiivoq.

Lars-Emil Johansenip Namminersorneq juunip 21-ani 2009-mi eqqunneqartoq aamma ilusilersueqataaffigaa.

Powered by Labrador CMS