Nuummi ima amerlatigisut akiuussusertereersimapput

Nuummi tunillatsissimasut affaat sinnerlugit akiuussuserneqanngillat. Nunatta nakorsaaneqarfiata tamanna ilisimatitsissutigaa tuniluunnerlu "akiuussuserneqanngitsut tunillaassuunnerat"-nik taallugu.

Nuummi innuttaasut pingasuugaangata marluk marloriarlutik akiuussusertereersimasarput. Nunatta nakorsaaneqarfiata kisitsisaataasa tamanna takutippaat.

Taamaasilluni Nuummi naammassillutik akiuussusertissimasut nuna tamakkerlugu naammassillugu akiuussusertissimasunit procentitigut amerlanerulaalaarput.

  • Nuummi innuttaasut 66,2 procentii naammassillugu akiuussusertereerput
  • Nuna tamakkerlugu innuttaasut 64,7 procentii naammassillugu akiuussusertereerput

Illoqarfiit pingaarnersaanni sapaatit akunnerni kingullerni inuit 200-t pallillugit tunillatsipput. Kikkullu tunillatsittarnersut ersarissiartorpoq. Tunillatsissimasut amerlanerpaartaat akiuussutissamik kapitissimanngillat.

- Tunillaassuunnerup ersarilluinnartumik takutippaa akiuussutissalertinneq iluaqutaasoq. Nuummi tunillatsissimasut 58 procentii akiuussutissalertissimanngillat, 9 procentit ataasiarlutik kapitissimapput 33 procentiilu marloriarlutik kapitissimasuullutik, nunatta nakorsaaneqarfia ilisimatitsivoq.

Akiuussutissaq perulunnissamut illersuutaavoq

Ilanngullugu erseqqissarneqaqqippoq coronavirusimut akiuussutissaq tunillatsinnermi perululernissamut aamma illersuutaasoq. Nunatsinni innuttaasut aqqaneq-marluleereersimasut akiuussutissalertinnissamut neqeroorfigineqartarput.

- Amerikamit CDC (Centers for Disease Control and Prevention, aaqq.), naapertorlugu akiuussutissalertissimasut perulunnginnerusarput tunillaannginnerusarlutillu. Danmarkimisuulli Islandimisulluunniit innuttaasut amerlaqataannik akiuussutissalertissimagaluarpata, maanna tunillaassuunneq taama annertutigitigissanngikkaluarpoq, nunatta nakorsaanera Henrik L. Hansen oqarpoq.

Tunillaassuuffik ilisimaneqanngitsoq

Tunillaassuunneq siullermik meeqqat akornanni ingerlagaluartoq, maanna inuiaqatigiit akornanni tamani tunillaassuuttoqarpoq. Ukioqatigiiaallu apeqqutaajunnaarput tunillaassuunnermi.

- Nuummi tunillaassuunnerup qanoq ingerlanera ersarikkunnaariartorpoq. Tunillatsissimasut amerlanerpaartaat tunillatsissimasunut ilisimaneqartunut attuumassuteqarput, sulili qanoq tunillatsinnerminnik ilisimasaqanngitsunik paasisaqartarpugut, Henrik L. Hansen oqarpoq.

Nuummi tunillatsittut amerlassusaat 22. september:

  • 28 procentii qulit ataallugit ukioqarput
  • 15 procentii 10-19-inik ukioqarput
  • 21 procentii 20-29-nik ukioqarput
  • 18 procentii 30-39-nik ukioqarput
  • 18 procentii 40-t sinnerlugit ukioqarput

Danmarkimi innuttaasut 74 procentii aappassaanik kapitereersimasut, Islandimi innuttaasut 77 procentii naammassillutik kapitereersimapput.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS