IA-mi siulittaasuusimasut sisamat: Nunanut allanut sillimaniarnermullu suliassat IA-p tigussavai
Partiip siulittaasorisimasaasa piumasaraat nunatta aqunneqarnera partiip siuttuuffigissagaa tassuunalu qulakkeerlugu Naalakkersuisut politikkiaat ingerlanneqarnissaa, inuullu ataatsip kamassaqarluni politikkimik ingerlatsinera unitsillugu.
Inuit Ataqatigiit siulittaasuat, 34-nik ukiulik Múte Bourup Egede aalajangiisuusumik sapaatiummat tunuliaquttaminut misilitsippoq. Tassami noqqaassuteqarpoq nunatsinni partiit annersaanni politikkikkut siuttuulluni suliarerusutani ingerlatiinnarumallugit, partii ullumikkut aappaluttutut/qorsuttut/tungujortutut imminut taasalersimasoq qanoq ingerlariaaseqassanersoq ilanngullugu ataatsimeersuartunut saqqummiussilluni, taamaaliuleruttornerani akornusersorneqarpoq Naalakkersuisuni suleqatiminit oqaasissaminik oqimaalutaaqqaarneq ajortumit aammalu politikkikkut qanoq pissuseqarnerminik soqutigisaqanngitsumit, nunanut allanut, inuussutissarsiornermut, niuernermut silallu allanngoriartorneranut atatillugu suliassanut akisussaasumit, Pele Broberg (N)-mit.
Aviisi Sermitsiaq allappoq.
Sermitsiaq, ataatsimeersuarnermi alaatsinaattoq IA-mi ataatsimeersuaqataasunit arlalinnit maluginiagaqaqquneqarpoq allaaserinnittoqarsimasoq: Kalaallit Nunaata naalakkkersuisuisuini sukataarnerpaap naalagaaffeqatigiinneq asoorpaa: »poortuinasi pissutsit oqaatigisarniarsigit«-mik qulequtserneqarsimasumik.
Allaaserisami Pele Broberg-ip nammineq isummersuutini malillugit naalagaaffeqatigiinnermik oqartarneq assortorlugu aammalu demokratii naapertorlugu ingerlatsisoqarnerani innuttaasut ilaasa taaseqataasinnaannginnissaannik Berlingske-mi ujartuivoq.
Siulittaasuusimasut iliuuseqaqqusipput
Partiip siulittaasorisimasai, Aqqaluk Lynge, Josef Motzfeldt, Kuupik Kleist aamma Sara Olsvig (Johan Lund Olsen sulinerminut atatillugu angalasimagami peqataanngilaq) sapaatiummat oqaaseqarnissaminnut periarfissaqartinneqarput. Ataatsimoorlutik oqaaseqaasiorsimapput quppernerit pingasungajaat atorlugit allassimasaminnik, tassanilu ersersinneqarpoq siunissaq qanoq ittoq partiip siulittaasorisimasaasa takorloorneraat.
Siulittaasuusimasut kissaatigaat meeqqanut inuusuttunullu tunngatillugu sulissutigineqartut sulissutigineqalikkersaartullu annertusarneqassasut, piitsuussuseq killilerneqassasoq, taamatuttaarli aamma aatsitassarsiornermut tunngatillugu uranitalinnik allatullu qinngornernik ulorianartortalinnik aatsitassarsioqqusinnginnerup iluani periarifissanik ersarissuliortoqassasoq kissaateqarput.
Taakkuli qaavisigut piumasaqaat allanngortitassaanngitsutut isumaqarnartoq, tassalu nunanut allanut sillimaniarnermullu politikkip ingerlanneqarnerani Inuit Ataqatigiit inuiaqatigiit sinnerlugit siuttuussasut akisussaasuussasullu, siulittaasuusimasut naapertorlugit ersarimmat ”ataatsimeersuaqataasut akornanni Naalakkersuisut sinnerlugit nalunaarutigineqartartut naammagineqannginnerat.”
Aviisimi Sermitsiami atuarnerusinnaavutit. Aviisi Sermitsiaq uani pissarsiariuk: