Vivian aamma Múte Nersornaammik kuultiusumik nersornaaserneqarput

Naalakkersuisut Siulittaasuat Múte B. Egede aamma Inatsisartuni siulittaasuusimasoq Vivian Motzfeldt politikkikkut sulinertik pillugu sisamanngornermi nersornaaserneqarput.

Inatsisartut ukiakkut ataatsimiinnerisa aallartinnissaat ullormik ataatsimik sioqqullugu Naalakkersuisut siulittaasuat Múte B. Egede (IA) aamma Inatsisartuni siulittaasuusimasoq Vivian Motzfeldt (S) kuultiusumik Nersornaaserneqarput.

Tamanna pivoq Hans Egedep Illuani sisamanngornermi 23. september nalliuttorsiualaarnertalimmik, Inatsisartullu siulittaasuat Hans Enoksen oqalugiartuutillugu.

Hans Enoksenip Vivian Motzfeldt politikkikkut sullarissutut, inuusuttullu atugaannik ukkassisutut taavaa:

- Qinikkatut tunniusimasutut inuusuttortatsinnut atugassarititaasunik minnerunngitsumillu ilinniartitaanermut tunngasunik annertuumik soqutigisaqartutit ilisimaarivatsigit. Aamma tunuarsimaarneq ajorputit naalakkersuinermik suliaqarnermi inuussutissarsiornermilu arnat angutillu naligiissitaanerisa nukittorsarneqarnissaat sammineqartillugu, Hans Enoksen nersornaasiinermini oqalugiarpoq.

Vivian Motzfelt tunngaviusumik Inatsisissaq pillugu Isumalioqatigiissitami siulittaasuusimavoq kiisalu ilinniartitaanermut, kultureqarnermut nunanullu allanut tunngasunut Naalakkersuisuusimalluni.

2018-imi Inatsisartunut siulittaasunngorpoq.

Mútep suliai nersorneqarput

Naalakkersuisut siulittaasuat, Múte B. Egede Inatsisartut siulittaasuannit Hans Enoksenimit Nersornaammik kuultiusumik aamma tunineqarpoq.

Politikkikkut sullarinnerminut, piffissallu sivikitsuinnaap ingerlanerani Naalakkersuisut siulittaasunngorluni angusaqarneranut nersornaat tunniunneqarpoq.

- Qinikkatut maannamut sulisimanerit eqqarsaatigalugu inuusunnerit – 34- iinnarnimmi ukioqaravit - siullertut maluginiarneqarnerusarpoq, minnerunngitsumik naalakkersuinermik malinnaasut akornannit. Tamatuma takutippaa piffissami sivikitsumi sulilu inuusuttuugaluarlutit naalakkersuinikkut annertuunik kusanartunillu angusaqareersimasutit, Múte B. Egedep nersornaaserneqarnerani Hans Enoksen oqalugiarluni oqarpoq.

Atorfimmi siuariartupiloortoq

- Naalakkersuinikkut qinikkatut suliaqarsimanippit annertuumik tunniusimasimanerit minnerunngitsumillu piumassuseqarnerit takutippaa, tamatumalu nersorniarneqarnissaa siulittaasoqarfiup kissaatigisimavaa maanna kuultiusumik Nersornaaserneqarnikkut.

Múte B. Egede politikkikkut suliaqarnera 2015-imi annertusivoq. Tassani Inatsisartuni ilaasortanngorami. Aatsitassanut naalakkersuisuusimavoq, partiiminilu Inuit Ataqatigiinni siulittaasuulluni.

Inatsisartunut qinersinermi ajugaareerluni 23. april Naalakkersuisut Siulittaasunngorpoq.

Powered by Labrador CMS