Erik Jensen: Aslakip unnerluunneqarsinnaannginnerata atuukkunnaartinnissanut tapersiissaagut
Aslak Jensenip unnerluutigineqarsinnaannginnerata atuukkunnaarsinneqarnissaa pillugu oqaluuserisassami Siumut atuukkunnaartitsinissamik tapersiilluni taaseqataassaaq. Aslakimik tapersersuinera apeqquserneqassanngilaq, Erik Jensen oqarpoq.
Inatsisartut ukiaanerani ataatsimiissallutik issiavimminnut ingikkuni suliassaasa siulliit ilagissavaat Aslak Jensenip inatsisartutut ilaasortaanermini unnerluutigineqarsinnaannginneranik atuukkunnaartitsinissaq. Suliassaq taanna tallimanngornermi, tassa ataatsimiinnerit ulluisa siullianni, matoqqasumik oqaluuserineqassaaq.
Aslak Jensen pisortat suliffeqarfiini sulisumut siorasaarisimasutut unnerluunneqarluni eqqartuunneqartussaavoq. Tamannalu aatsaat pisinnaavoq unnerluutigineqarsinnaanera Inatsisartut akuerippassuk.
Siumup gruppia Aslak Jensenip unnerluutigineqarsinnaannginnerata atuukkunnaartinnissaanut taaseqataassaaq.
- Aslak Jensenip Inatsisartutut ilaasortaanermini unnerluutigineqarsinnaannginnerata atuukkunnaartinnissaanik Siumup gruppianit tunuliaqutsiilluta taaseqataassaagut, Erik Jensen Sermitsiaq.AG-mut oqarpoq.
Sinniisumik aggersaasoqassanngilaq
Unnerluutigineqarsinnaannginnerup atuukkunnaarsinneqarnera isumaqanngilaq Inatsisartuni ilaasortaq qinigaaffimminit sulinngiffeqartariaqalissasoq, Inatsisartoqarfimmi atorfilittaq Kent Fridberg nassuiaavoq.
Qinigaasinnaanermut apeqqut eqqartuussiviup suliamik naammassinnereernerata kingorna aatsaat oqaluuserineqassaaq, inatsisartuni ilaasortaq pineqaatissinneqarsimappat. Suleriuserlu tamanna Erik Jensenip Siumullu malinniarpaat:
- Soorunami Aslak Jensen tapersersorpara. Eqqartuussiviup naliliinera takuneqaqqaartussaavoq, pissaanermi pingasunut aggulussimavoq. Eqqartuussiviup suliassani suliarissavai, kingorna inernera naliliiffigineqarumaarpoq, Erik Jensen oqarpoq.
Erik Jensen oqaluttuarpoq Aslak Jensenip sinniisussaanik aggersaasoqassanngitsoq. Aslak Jensenimi politikkimik suliaqaannassaaq.