Tusarniaaneq: Qimmit qimuttut pitsaanerusumik illersorneqassapput
Kalaallit qimmii qimuttut qimminik allanik akuneqannginnissaat ilungersunartumilluunniit nappaateqalinnginnissaat anguniarlugit pitsaanerusumik illersorneqartalissapput.
Kalaallit qimmiisa qimuttut illersorneqarnissaat pillugu inatsisissaq nutaaq Naalakkersuisut tusarniaassutigalugu nassiuteqammerpaat.
Inatsisissatut siunnersuummi aalajangersagaqarpoq, qimmit qimuttut qimminik allanik akuneqarsinnaanerannut tuniluuttumilluunniit nappaateqalersinnaanerannut Nunatsinni innuttaasut illersuinissaannik imaqartumik.
Inatsit siusinnerusukkut Qimmeqarneq qitsuuteqarnerlu pillugit Inatsisartut inatsisaattut taallugu tusarniaassutigineqarnikuuvoq.
Tusarniaanermut akissuteqaatini erseqqissaassutigineqarpoq, qimmit qimuttut qimmillu allat immikkoortillugit pitussimaneqartinneqartassasut. Taamatut kissaateqartoqarnera politikkikkut taperserneqarpoq. Taamaammat inatsisissatut siunnersuummik nutaamik sanasoqarsimavoq, taannalu qimmeqarneq qitsuuteqarnerlu pillugit Inatsisartut inatsisaannut ilanngullugu maanna tusarniaassutigineqarpoq. Aalisarermut Piniarnermullu Naalakkersuisoqarfimmi pisortaq Jørgen Isak Olsen Sermitisaq.AG-mut taamatut ilisimatitsivoq.
Akuneqatsaaliuineq napparsimatsaaliuinerli
Naalakkersuisut inatsit aqqutigalugu Kalaallit Nunaanni qimmit qimuttut illersorneqarnerat atuutiinnarneqarnissaallu sukateriffiginiarpaat, tassa qimminik nakkutilliineq pitsaanerulersinniarlugu.
- Siunnersuutip pingaarnersarivai kalaallit qimmiata qimuttup akuneqatsaalinissaa illersorniarlugu suliniutinik arlalinnik eqqussisoqarnissaa, ilaatigut qimminik qimuttoqarfiusunut qimminik qimuttuunngitsunik eqqussinissaq sunaluunniit inerteqqutaassasoq taamaasillunilu akusinissamut aarlerinartoqannginnerussaaq, ilaatigut annertusisamik akiuussutissamik kapisisoqartarnissaanut pilersaarusiornikkut nappaalalernissamut illersuisoqassaaq kiisalu qimminik nuussinissamut sakkortusisamik malittarisassaqarnikkut, aammalu uumasunik illersuinermut malittarisassat pitsanngorsaavigineqarlutik, inatsisissatut siunnersuummut tusarniaassutigineqartumi allassimavoq.
Peqatigitillugu kommunalbestyrelsit qimminik qimuttunik nakkutilliisarneq ingerlatilissavaat. Nakkutilliinermi ilaatigut qimmit qimuttut nalunaarsorneqartarput akiuussutissalersorneqartarlutillu.
Qimmit akusat unammillernartitsisut
Qimmit qimuttut qimminik allanik akuneqartarnerat ukiuni qingullerni akulikitsumik oqaluuserineqartarpoq. Qeqertarsuarmiut qimmii qimuttut qimminik allanik akuneqarsimanerat pissutigalugu Avannaata Qimussersuarnut peqataasinnaatitaasimanngillat, qimmiutillillu qimmitik allanik akusaanngitsut uppernarsarsinnaanngikkunikku sukkaniuttoqarneranut ilaaqqittalernissaat ilimananngilaq.
Inatsisartuni ilaasortap Doris J. Jensenip qimmit qimuttut ajunngitsumik atugaqartinneqarnissaat sorsuutigisimavaa. 2017-imilu Qeqertarsuarmi qimmit qimuttut qimminik allanik akuneqarsimannginnerat qulakkeerniarlugu DNA-visa misissorneqarnissaannik Naalakkersuisut peqquneqarnissaannik Inatsisartut aalajangiiffigisissaattut saqqummiussaqarsimalluni.
Qimmit qimuttut ukiuni kingullerni aamma qimmit nappaataannik ilungersuatinneqarsimapput.
Tusarniaaneq ulloq 14. oktober 2021 naammassineqassaaq. Tusarniaanermi atortut UANI atuarsinnaavatit. Inatsisissatut siunnersuut 2022-mi upernaakkut ataatsimiinnermi Inatsisartunut saqqummiunneqassasoq naatsorsuutigineqarpoq.