Peter Grønvold unnerluunneqartoq - eqqartuussivimmut sassartinneqalerpoq

KNI-mi pisortaanerusimasoq Peter Grønvold Samuelsen pissutsini tallimani, kannguttaatsuliorsimanermut tunngassuteqarni unnerluunneqarluni eqqartuussivimmut sassartinneqalerpoq. Unnerluussisussaatitaasut qaammatini pingasuni pineqaatissinneqarsimasunut inissiisarfimmiittussanngortinneqarnissaa piumasarivaat.

Arnat arlallit KNI A/S-imi sulisuusimasut ukioq manna martsip qaammataani Peter Grønvold Samuelsen kannguttaatsuliortarsimasutut unnerluutigivaat. Politiit misissuinertik naammassisimavaat, unnerluussisussaatitaasullu pisortaanerusimasoq politiinut unnerluutigineqarami KNI A/S-imi pisortaanertut tunuarsimasoq unnerluutigineqassasoq aalajangersimallutik.

Pissutsini unnerluussutigineqartuni tamani, pisortaanerusimasup 2016-imi januaarip qaammataaniit 2021-mi februaarip qaammataata tungaanut arnat timaasigut attuualaartarsimavai, unnerluussummi Sermitsiaq.AG-mit takuneqarsimasumi allassimavoq.

Pissutsit pineqartut ilaanni ataatsimi unnerluussutigineqarpoq, eqqunngitsuliorfigineqarsimasoq ”pukusuatigut, tuiisigut, siffiaatigut attuualaartarsimavaa eqitaartarsimallugulu kiisalu ersaatigut kunittarsimallugu. pineqartunilu taakkunani tamani unnerluutigineqartoq kannguttaatsuliortarsimalluni”.

Oqaatsitigut assigiinngitsunik kanngunarsaasarsimasoq

Pisimasumi allami Peter Grønvold Samuelsenip arnaq nuluisigut aamma attuualaarsimavaa, ”soorlu aamma arlaleriarluni arneqa pineqartoq eqitaartarlugulu ersaatigut kunittarsimagaa, minnerpaamillu ataasiarluni arnaq uniisigut kaalluguu iviangertusaasa naatiffii pinnguarisarsimavai kiisalu dildonik eqqartuisarsimalluni”.

Unnerluussummi ilanngullugu atuarneqarsinnaavoq, pisortaanerusimasoq arnamut oqarsimasoq ”qanorli siniffimmut qilersorlutit” ilaannilu oqarsimasoq ”ilaanni naalanngittuulaartarama”.

Unnerluussummi allami allassimavoq, Peter Grønvold Samuelsenip arnaq pineqartoq ”uniisigut attuualaajutigalugu assamminik iviangii aalatissimagai kingusinnerusukkullu pukusuatigut kunissorsimagaa, soorlu aamma unnerluutigineqartup arnaq pineqartoq tigoriarlugu ”trillebøri”-tut taaneqartartumik atoqatigiinnissaq eqqartorsimagaa.

Pisuunnginnerartoq

Qeqqata Eqqartuussiviata eqqartuussivimmut sassartitassat pillugi allattorsimaffiani takuneqarsinnaavoq, eqqartuussinissaq decembarip aallaqqaataani nalunaaqutaq aqqanernut aamma decembarip aappaani nalunaaqutaq qulingiluanut pisussatut inissinneqarsimasoq.

Peter Grønvold Samuelsen eqqartuussissuserisutut illersuisoq Finn Meinel illersuisoriniarlugu aalajagersimavoq, suliamut atatillugu ilisimannittunik aggersaasoqassasoq, allattorsimaffimmi atuarneqarsinnaavoq.

Sermitsiaq.AG-p Peter Grønvold Samuelsen oqaaseqartinniaraluaramiuk ilutsinngitsoorpaa, Finn Meinelilli ilisimatitsissutigaa, pineqartoq unnerluussutini tamana pisuussuteqanngitsuunerartoq.

- Ilanngullugu oqaatigisinnaavara Peter Grønvold Samuelsenip suliap suliarineqarlunilu naammassineqarnissaa qilanaarimmagu, eqqartuussissuserisutut illersuisoq unnerluussutigineqartunut maannakkorpiaq oqaaseqarsinnaannginnerartoq ilisimatitsivoq.

Powered by Labrador CMS