Illoqarfiit pingaarnersaanni tunillatsissimasut nutaat 35-t

Nuummi tunillatsissimasut marlunngormat amerleqqillutik, tunillatsissimasut nutaat 35-t nassaarineqarsimapput. Inuit hunnorujulikkuutaat ataasinngornermi misissortinniarlutik tulleriiaareerlutik misissortissimanerisa tamanna takutippaa. Marlunngornermi nunap sinnerani tunillatsittoqarsimanngilaq.

Nuummi inuit tunillatsissimasut aatsaat taamak amerlatigisut marlunngormat paasineqarpoq. Tunillatsissimasummi nutaat 35-t nassaarineqarsimapput, nun.gl.ip kisitsisaataani tamanna takuneqarsinnaavoq. Ataasinngornermi inuit 755-it misissortissimapput.

Nuummi misissuisarfik sapaatiummat matoqqasimavoq, taamaammat misissuisarfimmi ataasinngornermi immikkut ulapaartoqarsimavoq, tulleriiaattummi ilaat nalunaaquttap akunneri sisamat avillugit utaqqisarsimagamik.

Sapaatip akunnerani kingullermi tunillatsissimasut amerliartornerat ingerlaannarpoq, Nunatsinni Nakorsaaneqarfik nun.gl-ikkut ilisimatitsivoq.

Sapaatip akunnerani 37-mi Nuummi innuttaasut 100.000-iusuuppata 390-it missaanniittut tunillatsissimasuusimassapput, taamalu Danmarkimi kommunip tunillatsisoqarnerpaasup marloriaataanik tunillatsittoqarsimalluni. Sapaatip akunnerani 37-mi Nuummi misissortissimasut 4.290-it 1,7 procentii tunillatsissimapput.

Tuniluuttoqartoq

Nuummi inuiaqatigiit tamarmik akornanni maanna tunillatsissimasoqarpoq. Tunillatsissimasut meeqqerivinnut, atuarfinnut ilinniartoqarfinnullu attuumassuteqarput. Ilinniartut ineqarfiini ilaatigullu inissiani killilimmik inissaqarfiusuni najugallit tunillatsissimasuupput.

Nuummi kingullermik 20-t sinnerlugit tunillatsissimasoqarpoq septembarip 15-iani, taamanikkut Nuummi inui 23-t tunillatsissimasut paasineqarpoq. Tamatumalu kingorna ullormut tunillatsittartut ikiliartulersimagaluarlutik.

Marlunngornermi tunillatseqqasut amerlassusaat
Powered by Labrador CMS