Danmarkimi politikerit Nunatsinniittut
Folketingip Nunarput pillugu ataatsimiititaliaa sapaatip akunnerani matumani Nuummut tikeraarpoq. Folketingip nunanut allanut ataatsimiititaliaa Nuummut aamma Kangerlussuarmut sapaatip akunnerata tulliani tikeraassaaq. Ataatsimiititaliat ukiumoortumik angalasarnerat piffissami matumani pisarpoq, angalanerillu Folketingimut ilaasortat Nunatsinni pissutsinik paasisimasaqarnerulernerannik kinguneqarniartussaapput
Folketingip Nunarput pillugu ataatsimiititaliaanut siulittaasup Aaja Chemnitz Larsenip (IA) Folketingimut ilaasortat amerlanngitsut angalasut sapaatip akunnera tamaat Nuummi angallappai.
Taama aviisi Sermitsiaq allappoq.
Angalaqataasut tassaapput Aki-Matilda Høegh-Dam (Siumut), Kasper Roug (S), Thomas Jensen (S), Christoffer Aagaard Melson (V), Karsten Hønge (SF), Christian Juhl (EL) aamma Søren Søndergaard (EL).
Tikeraartut ilaatigut ataatsimeeqatigivaat Issittumi Sakkutooqarfik, Visit Greenland, Kalaallit Airports, Nunatsinni Eqqartuussivik, Nunatta Politiivi, Pinerluuteqarsimasunik Isumaginnittoqarfik, Ilisimatusarfik, Grønlandsbanken aamma Kofoeds Skole kiisalu Inatsisartunut ilaasortat.
– Pingaarnertut ataatsimiititaliami ilaasortat ilaat siullermeerlutik Nunatsinniimmata, tamatumani qulakkeerniarneqarpoq, angalanermi kikkut tamarmik Nunatsinni pissutsinik tamakkiisumik paasissutissinneqarnissaat. Pisumut aalajangersimasumut atatillugu eqqartuussiveqarfimmeersunik ataatsimeeqateqarnitsinni oqaluuseraarput Nunatsinni eqqartuussivikkoortumik nalunaarsuinerup digitalinngortinneqarnissaanik pisariaqartitsineq.
