Innuttaasut arlallit siusinaarpallaartumik aappassaanik kapitissimasut
Innuttaasut arlallit Pfizerimik akiuussutissalerneqarsimasut siullermik kapitinnermiit ullut 21-t qaangiuteqqajanngitsut aappassaanik kapitissimapput. Suliaq Nunatta Nakorsaaneqarfiata maanna misissorpaa.
Obs. Statens Serum Institut Danmarkimiittup nakorsaaneqarfik isumaqatigaa, innuttaasut aappassaanik kapitereersimasut pingajussaanik kapitittariaqalernissaanut tunngatillugu. Coronapasimik pisariaqartitsisut kisimik kapiteqqissapput. Taamaammat allaaserisaq allanngortinneqarpoq nalunaaqutaq 15.00.
Innuttaasut 192-it Pfizerimik siusinaarpallaartumik aappassaanik akiuussutissalertissimapput.
Sermitsiaq.AG-p Maniitsumi innuttaasunit saaffigineqarnerminit tamanna paasivaa.
Sermitsiaq.AG-p innuttaasup kapitissimanermut uppernarsaataanik takusaqarsimavoq. Innuttaasoq 9. april 2021-mi siullermeerluni Pfizerimik kapitissimavoq. 27. april 2021 aappassaanik kapitissimasutut allaqqavoq. Tassa siullermeernermit ullut 18-it qaangiuttullu. Oqartussat siornatigut nalunaarutigisareerpaat kapiteqqaarnermit aappassaaneernissamut ullut 21-t qaangiutereersimasassasut.
Nunatta Nakorsaaneqarfiata Sermitsiaq.AG-mut uppernarsarpaa siullermik aappassaanillu kapitinnermi ullut akulikippallaarsinnaasunik ilisimasaqarlutik. Innuttaasut pineqartut nakorsaaneqarfiup attavigisimavai.
”Akiuussutissalertinneq aallartissimavoq”
Innuttaasut ullut 18-it qaangiunnerini aappassaanik akiuussutissalertissimasut danskit coronapasianni, Danmarkimi angalanermi atortussami, "Akiuussutissalertinnermik aallartitsisimasut" nalunaarsorsimapput. Coronapasimi naammassilluni akiuussutissalertissimasutut nalunaarutigineqarsinnaapput innuttaasut kapiteqqaarnermit ullut 19-it qaangiunnerini kapiteqqissimasut.
Nakorsaaneqarfiulli erseqqissarpaa marloriarluni kapitissimagaanni naammassilluni kapitittoqarsimassasoq:
- Innuttaasut kapiteqqaarnermit ullut 18-it qaangiunnerini aappassaanik kapitissimasut naammattumik akiuussutissalerneqarsimasutut isigineqarsinnaapput, nakorsaaneqarfimmit Paneeraq Noahsen ilisimatitsivoq.
Kukkusoqarsimanera peqqinnissaqarfinnut ilisimatitsissutigineqarpoq. Taamallu pisoqaqqinnginnissaanut iliuuserisassanik qulakkeerinnittoqareerluni. Innuttaasut danskit coronapasiannik atuisussat pillugit peqqinnissaqarfik maanna sulissuteqarpoq.
- Ajornartorsiut aaqqiivigineqarsinnaavoq innuttaasut danskit coronapasiannik atuisussat pingajussaannik kapitinnerisigut. Akiuussutissaq Pfizer imaluunniit Moderna atorneqarsinnaavoq. Kapitinnissaq pissaaq aappassaanik kapitereernermit siusinnerpaamik ullut 19-it qaangiussimappata, oqaatigineqarpoq.
Suliaq ingerlanneqarpoq
Innuttaasut aappassaanik kapitiaartoorsimasut danskilli coronapassiannik atuisariaqanngitsut pingajussaannik kapitittariaqanngillat.
- Nakorsaaneqarfimmit nalilerparput pingajussaanik kapiteqqinnissaq pisariaqanngitsoq, taamaattoq Danmarkimi Statens Serum Institut suliaq pillugu attavigaarput, Paneeraq Noahsen ilisimatitsivoq.
Nakorsaaneqarfiup ilisimatitsissutigaa Danmarkimi Statens Serum Institutip nunatsinni peqqinnissaqarfik isumaqatigigaa. Tassa aappassaaneerlutik kapitiaarsimasut naammassillutik akiuussutissalersimasutut nalilerneqartut. Coronapasimilli pisariaqartitsisut pingajussaaneerlutik kapitittariaqassapput.