Peqquserluttarnerup akiorniarnera kigaatsumik ingerlavoq

Ingerlatseqatigiiffiit pisortanit pigineqartut amerlasuut oqaatiginninnermik aaqqissuussinerup eqqunnissaa ulapputiginngilaat. Tranparency International Greenlandip Naalakkersuisut kajumissaarpai ingerlatseqatigiiffiit sukkanerusumik iliuuseqassasut piumaffigeqqullugit.

IA sinnerlugu Inatsisartunut ilaasortaq: - Qularinngilara sulisitsisuunngitsup iliuutsinik naleqqutinngitsunik isumaginnittuunera tamanna oqaatiginnittumut toqqissisimanermik isumannaassutsimillu annerusumik misigisimanermik tunniussaqassasoq.

Inatsisiliornikkut oqaatiginnittut illersorneqassapput, taamaasilluni oqaatiginnittut nammineq isumannaatsuunertik pilliutiginagu inatsimmik unioqqutitsisunik tikkuaasinnaassallutik. EU malittarisassaqarpoq, tassuunakkullu nunat ilaasortaatut peqquneqarput oqaatiginnittut inatsisitigut aningaasatigullu tapersersussagaat, maannalu Transparency International Greenland kaammattuivoq nunatsinni inatsisiliornikkut oqaatiginnittunik illersuineq taamaattoq eqqunneqassasoq.

Aviisi AG taama allappoq.

Tamatumunnga tunuliaqutaavoq paragraf 37 naapertorlugu Inatsisartunut ilaasortap Sofia Geislerip (IA) apeqqutigimmagu pisortat allattoqarfiini ingerlatseqatigiiffinnilu pisortanit pigineqartuni oqaatiginninnermik aaqqissuussinermik suliaq qanoq ingerlanersoq.

- Oqaatiginnittartut peqquserluttarnerup akiorniarnerani, taamaasillunilu oqartussaaqataanermut, atortussat ilagaat. Oqaatiginninnissarlii qunugineqartariaqanngilaq. Oqaatiginnittut illersornerisigut, assersuutigalugu inatsisikkut, qulakkeerneqassaaq oqaatiginnittup nammineq isumananatsuunini pilliutiginagu inatsimmik unioqqutitsisunik tikkuaasinnaassasoq. Taamatut AG-mut oqarpoq Bodil Karlshøj Poulsen, taannalu Transparency International Greenlandip allattoqarfiani pisortaavoq.

Bodil Karlshøj Poulsenip EU innersuussutigaa, taassuma malittarisassakkut nunat ilaasortaasut peqqusimammagit oqaatiginnittut inatsisikkut aningaasatigullu illersussagaat. Taanna kaammattuivoq illersuineq taamaattoq Kalaallit Nunaanni inatsimmut ilanngunneqassasoq.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS