Mittarfiliassanut kukkusumik missingersuusiorsimaneq: Inatsisitigut akisussaatitsisoqassanngilaq

Mittarfiliornerit akisunipilussuunissaat ilisimasallip 2020-mi mianersoqqutigisimagaluaraa, Naalakkersuisut oqaatigaat mittarfiliassanut kukkusumik missingersuusiorsimanermut inatsisitigut akisussaatitsisoqassanngitsoq.

Nuummi Ilulissanilu mittarfiliornerit naatsorsuutigisamit akisunipilussuupput, tamatuma malitsigisaanik Kalaallit Airports A/S immikkut 900 millioner koruuninik taarsigassarsiniarusuppoq. Tamatumunnga peqatigitillugu oqaatigineqarsimavoq, Qaqortumi mittarfiliornissamut suliariumannittussarsiuussineq missingersuusiarineqarsimasunut sanilliullugu marloriaammik akisunerulersimavoq.

Anders Olsenip Siumumeersup paragraf 37 naapertorlugu Naalakkersuisunut apeqqutigisimavaa, ”siunnersuinerluttoqarsimappat kukkusumilluunniit naatsorsuisoqarsimappat” inatsisitigut akisussaatitsisoqassanersoq.

Oqartussaasut piumasaqaataasa allanngorsimanerat

Attaveqatigiinnermut Naalakkersuisup Naaja H. Nathanielsenip Anders Olsenimut akissuteqarnermini ilisimatitsissutigaa, ”Matumani siunnersuinerluttoqarsimasimasoq kukkusumilluunniit naatsorsuisoqarsimasoq Naalakkersuisut isumaqassallutik tunngavissaqanngitsut”.

- llaatigut matumani oqartussaasut piumasaqaataasa allanngornerisa, inatsisit allanngornerisa tunngavissallu allanngornerisa kingunerisaat pineqarput. Siunnersortit aallaqqaammut taamaallaat sanaartornermut aningaasartuutissanik naliliinissamut qinnuigineqarsimapput, taamaattumillu piffissap sanaartorfiusup nalaani ingerlatsinermut aningaasartuutinut akitsorsaataasut sanaartornermut missingersuutinut ilaatinneqarsimanngillat, Naaja H. Nathanielsen ilisimatitsivoq, nangillunilu:

- Taamaattumik matumanerpiaq inatsisitigut kingunerisassanik soqanngilaq, tamannali pissappat KAIR International A/S-ip isumaqatigiissummut atsioqataasutut isumagisussaavai.

Missingersuutit sinnerneqassasut ilimagineqarsimasoq

Paasissutissiissutigineqartut Kalaallit Airportsimi suliniummut pisortaasimaup Johannes Ehmannsip 2020-mi decembarip qaammataani aviisimut Sermitsiamut oqaatigisimasaaanit allaanerupput, tassa missingersuutit sinnerneqarnissaat ilisimaneqanngikkallarmalli.

- Naliliivunga Nuummi, Ilulissani Qaqortumilu mittarfiit katillutik 5,5 aamma 6 milliarder koruunit akornanni akeqassasut, Kairip suliniutit aqussinnaanngippagit, aammalu selskabip suliniummik aqutsisut, siunnersortit aamma suliarinnittussarsiuutseriaatsit eqqarsartariaatsiniluunniit allanngortinngippagit, Johannes Ehmanns ilaatigut Sermitsiamut taamanikkut oqarpoq.

Johannes Ehmanns qaammatini ikittuinnarni Kalaallit Aiportsimi suliniummi pisortaasimavoq, 2019-imilu aggustip qaammataani tunuarluni. Taannali ukiut 20-t sinnerlugit nunarsuarmi tamarmi timmisartoqarfiliornissamut pilersaarusiornermik sanaartornermillu misilittagarpoq. Misilittakkat ilisimasallu mittarfinnik ingerlatseqatigiiffimmi inissaqartinneqarunnaarsimarpasipput, ingerlatseqatigiiffik Ehmanns tunuarmalli nutaamik pisortaanertaarlunilu siulersuisuini siulittaasoqalersimavoq.

Powered by Labrador CMS