Tunillatsittut nutaat arfinillit
Nunatsinni coronamik tunillatsissimasut arfinilinnik ilapput. Paasissutissanik Nunatta Nakorsaanera maanna katersileruttorpoq. Kisitsisit nutaat takutippaat kujataanni maanna aqqaneq-marlunnik Kommuneqarfik Sermersuumilu arfineq-marlunnik tunillatsittoqarsimasoq.
Oqartussat kisitsisit sapaammi nun.gl-mi nutarterpaat. Kisitsisit kingulliit takutippaat Nunatsinni maanna tunillatseqqasut 26-iusut. Kisitsit 20-iusimagaluarput. Maannamut oqartussaniit oqaaseqartitsinissaq iluatsissimanngilaq.
Kommune Kujallermi 12-it tunillatsissimapput, Kommuneqarfik Sermersuumi 7-it, Qeqqata Kommuniani 6-it Avannaata Kommunianilu ataaseq.
Tallimanngornerup unnuakkuani pingasut aamma tunillatsissimasut paasineqarpoq. Marluk Nuummi Qaqortumilu ataaseq. Nuummi tunillatsissimasoq ataaseq nunaqarfinni Atammimmi Kangaamiunilu aqqusaarsimavoq. Innuttaasut Attammimmiittut arfininngornermi nal. 14.00 misissortipput, Kangaamiunilu innuttaasut marlunngornermi juulip 20-ani misissortissallutik.
Kujataani tunillatsittut amerlisut
Kujataani coronamik tunillatsissimasut sisamanik ilasut tallimanngonerup ullaavani nalunaarutigineqarpoq. Tunillatsissimasut tamarmik mattusimatinneqarput oqartussallu tunillatsissimasinnaasunik misissuinertik aallartippaat.
Qaqortumiit Sarfaq Ittummi ilaasut tallimanngornermi misissorneqarput. Ilaasullu Paamiunut niusussat 26-it angerlatitaagallarlutik. Ilaasut tamarmik misissortereernerisigut tunillatsittoqarsimanngitsoq paasineqarpoq umiarsuarlu angalaqqissinnaanngorluni. Ilaasullu angerlarsimaannarnissaat atorunnaarsinneqarluni.