Sermersuumi pisortat marluk suliunnaartut

Kommuneqarfik Sermersuumi pisortat marluk paaseqatigiinnikkut isumaqatigiissuteqarlutik suliunnaartut, kommune nittartakkamini ilisimatitsivoq.

Sermitsiaq.AG junimi allaaserinnippoq Hans Henrik Winter Johansenip atorfeqarnera pillugu tusarniaasoqartoq. Maanna taanna suliunnaarpoq.

Borgmesterip pisortat marluk sulisimanerannut qujassuteqarpoq:

- Larsip aamma Hans Henriup ukiuni kingullerni arlaqartuni kommunip ineriartorneranut annertuumik sullissisimanerat pillugu qutsavigerusuppakka, siunissamilu ajunnginnerpaanik kissaallugit, borgmester Charlotte Ludvigsen (IA) kommuni naapertorlugu oqarpoq.

Hans Henrik Winther Johansen 2018-imili pisortaasimavoq. Lars Møller-Sørensen 2016-imi pisortaaninngorpoq, Asii Chemnitz Narupillu (IA) borgmesteriunerata nalaani pisortaaninngorluni.

Lars Møller-Sørensen 2014-imi kommunimi sulilerpoq, siullermik Aningaasaqarnermut Sulisoqarnermullu sullissivimmi pisortaalluni. Lars Møller-Sørensen aningaasaqarnermut ingerlatsinermullu pisortatut nunatsinni misilittagaqarluarpoq. Mittarfeqarfinni 1995-imi sulisoqarnermut pisortatut atorfinissimavoq, kingornalu KNI-mi aningaasaqarnermut pisortatut aamma pisortap tulliatut ukiuni aqqaneq-marlunni inissisimasimalluni.

Kommune: Illuatungeriit annerusumik oqaaseqassanngillat

Kommune ilisimatitsivoq kommunimi pisortaanissamik inuttassarsiornissamut allagarsiinissaq piaartumik suliarineqassasoq. Sanaartornermut Avatangiisinullu pisortatut atorfik kingusinnerusukkut allagarsiunneqassaaq, kommunimi pisortaaneq atorfinitsitsinissami suleqataasussaanera pissutigalugu.

Stabschef Alex Nørskov Sanaartornermut Avatangiisinullu ingerlatsivimmi pisortanngortinneqarallarpoq, kommunimilu pisortap tullia Marie Fleischer kommunimi pisortaaninngortinneqarallarluni.

Marie Fleischer kommunimi pisortaanissarsiornermi suleqataassaaq, taamaattumillu atorfimmut qinnuteqartuussanani.

Pisumi illuatungeriit annertunerusumik oqaaseqassanngitsut, kommune ilisimatitsivoq.