Kujataani meeqqat Kenyamiit ilinniartinneqarsimasut
Ungasissumiit tuluttut misiliutigalugu ilinniartitsisimaneq angusaqarfiulluarsimasoq, nalunaarummi nutaami atuarneqarsinnaavoq.
Meeqqat marluk Kujataani nunaqarfimmi atuartut Kenyami ilinniartitsisumit tuluttut ilinniartinneqarsimapput.
Ungasianit ilinniartitsisarneq pillugu nutaanik ilisimasaqalernissaq anguniarlugu ilinniartitsisimaneq misiliummut ilaasimavoq. Ungasianiit misiliummik ilinniartitsineq ukiumi atuarfiusumi 2016/2017-imi ingerlanneqarsimavoq, misiliisimanerli pillugu nalunaarusiaq aatsaat saqqummiunneqarpoq, angusaqarfiulluarsimasorlu oqaatigineqarluni.
Nalunaarusiami allassimavoq, klassini assigiinngitsuni atuartut tamarmik ilinniagassatigut tamatigut ungasissumit ilinniartinneqarsimanertik pissarsiffigilluarsimagaat:
Kingusinaarluni aallartinneqarsimagaluarluni atorneqarsinnaasoq
- Oqaatigineqarsinnaavoq ungasissumit ilinniartitsineq atuartut tuluttut oqalullutik pisinnaasaasa ineriartortinneqarnissaannut atorneqarsinnaasoq, suliniummi matumani meeqqat tuluttut oqaatsit takornartat allat oqasiisut atugarisarpaat, Anders Øgaard Institut for Læringimi lektoriullunilu ph.d.-usoq allappoq.
Kenyamit ungasissumit ilinniartitsinermi ilinniartitsisup Kenyameersup atuartut tuluttut oqaluuttarpai, atuartullu tuluttut, kalaallisut danskisullu akissuteqartarlutik aamma titartakkat, ilisarnaatit timertillu atorlugit akissuteqartarput.
Ilinniartitsisup atuartullu oqaloqatigiittarnerat minutsini tallimaniit nalunaaquttap akunnera angullugu sivisussuseqartarsimavoq.
Anders Øgaardip nalunaarusiap kingusinaarluni saqqummiunneqarnera ajuusaarutigaa, oqaatigaluguli coronap tuniluunneratigut atuartut atuarfimmiisinnaasanngikkaluartut eqqarsaatigalugu taamatut ilinniartitsineq suli atorneqarluarsinnaasoq.
Ilisimasalinnit akuersaarneqartoq
Lektorip oqaatigaa, tuluttut ilinniartitsilluni misiliineq Kalaallit Nunaanni meeqqat atuarfianni atorluarneqarsinnaasoq, tuluit oqaasii meeqqat atuarfianni danskit oqaasiinut sanilliulugit ilinniartitsissutigineqartassanersut politikkikkut oqallittoqarnera oqallittoqarsimaneralu pissutigalugit.
Ilisimasallit tassunga atatillugu meeqqat atuarfiini tuluttut ilinniartitsisarneq nalilersorsimavaat, misiliinikkullu amigaataasarsimasut ilaat ilisimasalinnit tikkuarneqartarsimasut naammassineqarsimasut, nalunaarusiami allassimavoq:
- Misiliisimaneq pisinnaasatigut kinguneqarluarsimavoq, tuluttut oqalussinnaaasoqarnerulernissaanik anguniagaqarluni atuarfinni oqaatsitigut ilinniartitsisarnermut isumassarsiorfiusinnaasoq, nalunaarusiami allassimavoq.