Ornittagaq nutaaq: Meeqqat tulluussimaarput

Meeqqanut ornittagaq nutaaq Nuummi tallimanngormat ammarneqartoq, meeqqanik inuusuttunillu illoqarfimmi unnuakkut aneeratik toqqissisimaffissamik pisariaqartitsisunik isumaginnittariaqarsimavoq.

Nuummi ornittakkami nutaami Farip Aqqutaa 10-miittumi, meeqqanut ikittunnguanut inersimasunit isumagineqartariaqarsimasunut unnuit unnuallu siulliit eqqissisimaffiusumik ingerlasimapput.

- Ammarsimanerput Nuummi meeqqat inuusuttullu akornanni tusarneqarpallaarsimanngitsoq qularnanngilaq. Isumaginninnermili pigaartut toqqissisimatitsiniartartullu aqqutigalugit Tussiarfissuup sapaatillu akunnerata naanerani meeqqanik isertitsisimavugut, ornittakkami pisortaq Cecilie Jeremiassen Sermitsiaq:AG-mut oqarpoq

Taassuma nassuiaatigaa, ornittakkami meeqqanik sinittoqarsimanngitsoq, takusinnaasimavaali meeqqat ornittakkamik isersimasimanerminnillu iluarusuuteqartut.

- Meeqqat ornittakkap inuusuttorpassuarnik inersimasunillu ikittunnguanik isersimasoqartarluni klubbiunngiunnera nuannaarutigisimavaat. Ilaat oqaluttuarpoq, ornittakamiinnini ”tulluussimaarutigalugu”, eqqissisimanera aamma inersimasumik qanimut oqaloqatigisinnaasaminik inoqarnera pissutigalugit, Cecilie Jeremiassen oqaluttuarpoq.

Inersimasumik attaveqartarneq

Ornittakkami pisortap nuannaarutigaa nutaamik neqerooruteqartoqalernera, meeqqat inuusuttullu angerlarsimaffimmi toqqissisimanannginnera pissutigalugu opganginermi sinittariaarummata imaluunniit illoqarfimmi angalaaginnartariaarummata.

- Meeqqanut qulingiluanut inissaqartitsivugut. Nukappiaqqat niviarsiaqqallu immikkoortillugit inissaqartitsivut aamma inersimasunik marlunnik najuuttoqartuaannassaaq. Ulikkaavinneqartarnissaa imatut anguniagaanngilaq – naamerluinnaq. Pingaaruteqarnerpaavoq, meeqqat angerlarsimaffimminni toqqissisimanngitsut ikiorneqarnissaat, ornittakkami pisortaq oqarpoq.

Taassuma oqaatigaa, sila aamma isertoqarpiarsimannginneranut pissutaasinnaasoq.

- Ukiukkut meeqqat kialaartumik toqqissisimasumillu avatangiiseqarnissamik pisariaqartitsinerussagunarput. Meeqqat inuusuttullu ammarsimasugut ilisimaleriarpassuk qanoq ineriartortoqassanersoq takussavarput, Cecilie Jeremiassen oqarpoq.

Aamma atuaruk: Meeqqat unnuiffigisinnaasaat Nuummi ammarpoq

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS