SIK-mi siulittaasoq: SQAK-p oqaasii kusanaatsut
Aalisartut kattuffiisa marluk KNAPK-p SQAK-llu oqqannerat SIK-mi siulittaasup Jess G. Berthelsenip akuleruffigalugu SQAK isornartorsiorpaa.
SQAK-p KNAPK kilisaatileqatigiiffissuarnik sullissinerarlugu oqarsimanerata malitsigisaanik, SIK-mi siulittaasoq allalluni oqarpoq, SQAK kusanaatsumik oqarnerarpaa.
- Matumani oqartariaqarpunga taamatut misiginngilluaasarakku, illuatungaatigulli
ilaasortami ukiut 30-t qaangiuppata aamma aalisaannarsinnaanerat aallavigalugu KNAPK
sulisutut isigigakku, SIK-mi siulittaasoq Jess G. Berthelsen tusagassiorfinnut nalunaaruteqarluni erseqqissaavoq.
Aalisarneq pillugu Ataatsimiititaliarsuupp suliani naammassingajalerpaa, ataatsimiititaliarsuullu qanoq innersuussuteqarsinnaanera eqqarsaatigalugu soqutigisat annertusiartorput, tamannalu tunngavigalugu soqutigisaqaqatigiit allattalersimapput.
Nipangiussisimasussaatitaaneq
Jess G. Berthelsenip innersuussutigaa – SQAK eqqarsaatigalugu - Aalisarneq pillugu Ataatsimiititaliarsuarmi ilaasortatut nipangersimasussaatitaanermik atsioqatigiittoqarsimasoq.
SIK-mi siulittaasup oqaatigaa, maanaannaq qaleralinniarsinnaanermut allagartanik amerlasuunik tunniussisoqartartoq, tamatumalu malitsigisaanik SIK-mi ilaasortat nunami suliunnaarlutik umiatsiaararsorlutik aalisartunngorsimasut.
- Aalisartut inuussutissarsiutigalugu aalisavissut aalisarlik, uagullu nunami sulisartut
aalisartut tulaataat suliarissavagut, Jess G. Berthelsen erseqqissaavoq.
Aalisapilunneq
Taassuma erseqqissaatigaa, SIK KNAPK-lu suleqatigiilluartut.
- Assersuutigalugu sinerissami qaleralittassat appartinneqassappata nunami sulisut aamma
eqqorneqartussaapput, tassami suliassaat annikillissammata, tamannali SIK-p
inooqataaffigisinnaavaa piffissaq ungasinnerusoq eqqarsaatigalugu, tassami
kissaatigeqaarput kinguaatta maani nunami suliassaqartuaannarnissaat, Jess G. Berthelsen allappoq, nangillunilu:
- Eqqaamassavarpummi maani nunami aalisarnerup tamangajatta inuutimmatigut,
aalisapilunnerlu ingerlaannassappat tamatta pinngitsoqarata eqqorneqartussaavugut,
imaasiallaannaq aaqqiivigneqarsinnaangitsumik.
Aamma atuaruk: SQAPK til KNAPK: Stop med at arbejde for store selskaber