Stine Egede Kujallermi ajugaavoq

Stine Egede, IA, Kommune Kujallermi qinersinermi ajugaavoq. Inuttut 410-nit taaneqarsimalluni Kommune Kujallermi ajugaasutut imminut taasinnaanngorpoq qularnanngitsumillu aamma borgmesteriuffik Kiista P. Isaksenimit, S, ukiuni kingullerni sisamani kommunimi borgmesteriusimasumit, tigusinnaanngussallugu.

Stine Egede 2017-imi kommunimut qinersinermi 313-init taaneqarpoq taamaalillunilu kommunimut qinersinermut kingullermut sanilliullugu taasinernik 97-inik amerlanernik pissarsilluni.

IA-p qinigassanngortitaa sulilernissaminut piareersimavoq:

- Killitsittorujussuuvunga. Kisianni ajunngilanga, aamma kommunimi akisussaaffimmik tigusinissamut piareersimavunga. Kommunimut pingajussaa qinigassanngortippunga, suliassarlu aamma tigorusuppara, Stine Egede Sermitsiaq.AG-mut oqarpoq.

Kommune Kujallermi taasinerit tamarmik kisinneqareerput, Qaqortumilu taasinerit aalajangiisuusut akuersissutigineqareerput.

Sammivimmik allannguineq

Kiista P. Isaksen ukiuni kingullerni kommunimi ajornartorsiornernik arlalinnik misigisaqartarsimavoq. Ilaatigut innuttasut kommunip innuttaasunik sullissineranik naammaginninnginnerminnik ersersitsisarsimapput arlaleriarlutillu kommunimut kommunalpolitikerinullu akerliussutsimik takutitsisarsimallutik.

Stine Egedep kommunalbestyrelsimi suleqatigiinnermik naammaginninnginnini arlaleriarluni ersersittarsimavaa qineqqusaarnermilu kommunalbestyrelsimut iseqqissaguni kommunip aaqqissugaanerani annertuumik allannguuteqartoqarnissaa neriorsuutigisimallugu.

Kisianni kommunimi siamasissumik suleqatigiittoqarnissaa pingaartippaa.

- Kommune Kujallermi siamasissumik suleqatigiittoqarnissaa kissaatigaara. Kisianni kommunimi annertuumik allannguuteqartoqarnissaanik kissaateqarnerput nalornissutigineqassanngilaq, maannalu takusinnaalerparput, qinersisartut aamma tamanna kissaatigigaat, Stine Egede oqarpoq.

Stine Egede Narsami 1964-imi inunngorpoq Igalikumilu peroriartorsimalluni.