IA Narsami ajugaallualaavissoq

IA Narsami Inatsisartunut kommunimullu qinersinerni siuariarluarpoq.

Narsami pisut kommunip sinnerani attanneqaannassappata Stine Egede Kommune Kujallermi borgmesterinngorsinnaavoq tulleq.

Inuit Ataqatigiit Narsami Inatsisartunut kommunimullu qinersinerni Siumumit Atassummillu taaguunneqarnerujussuuvoq.

Partii Kuannersuarni aatsitassarsiorfiliornissamik suliniummut ersarilluinnartumik naaggaarsimavoq, tamannalu qinersisartunit kommunimut qinersinermi 30 procentpointinik siuariartitsinermik akilerneqarsimavoq. Kommune Kujalleq tamakkerlugu taamatut ingerlasoqaannassappat Kujataani innuttaasut nutaamik borgmesterertaassapput.

Inatsisartunut qinersinermi Inuit Ataqatigiit aamma ajugaarujussuartussatut isikkoqarput. Taasisinnaatitaasut 4.811-nik amerlassuseqarmata taasinerillu 1776-it kisinneqareerneranni IA taasinerit 53,3 procentiinik pissarsisussatut isikkoqarpoq, 2018-imi Inatsisartunut qinersinermi kingullermi 29,6 procentinik pissarsisimalluni.

valg.gl
Powered by Labrador CMS