Nuummi qinersivimmut suli utaqqisoqartoq
Qinersinermi peqataasut kingullermik qinersisoqarneranisut qaffasissuseqartussatut isikkoqarput. Illoqarfiit pingaarnersaanni taasiniarlutik utaqqisut suli tunuleriaarpassuupput.
Nalunaaqutaq 19.00 illoqarfiit pingaarnersaanni taasisinnaasunit 13.700-t missaanniittunit 41,15 procentit Inatsisartunut qinersisimapput 39,78 procentillu kommunimut qinersisimallutik.
Ullumikkut qinersivimmukaasimasut saniatigut innuttaasut 11 procentiisa missingi qinersinissaq sioqqullugu allakkatigut taasisimapput.
Nalunaaqutaq 20.00 qinersiviup pisortatigoortumik matunissaa sioqqutitsiarlugu Inussiviup saavani siuleriiaassimasut suli amerlapput. Kommuneqarfik Sermersuumi attaveqaqatigiinnermut pisortaq, Lars Damkjær, Sermitsiaq.AG-mut paasissutissiivoq, qinersisartoq kingulleq taasitinnagu qinersivik matunavianngitsoq.
Taamaattumik qinersinermi aqutsisut aalajangersimapput siuleriiaassimasut tamarmik taasinissaat angutserlugu matu ammatinniarlugu.
- Matut qaqugu matujumaarnerlugit piffissaliisimanngilagut. Akunnerit marlussuit ingerlasinnaagaluarpulluunniit. Siuleriiaassimasuniittut tamarmik taasinissamut periarfissaqassapput, siuleriaassimasullu qimaguteqqusinnaanngilavut, taasinissamut pisinnaatitaaffeqarmata, qinersivimmi nakkutilliisut ilaat, Jens Berthelsen, oqarpoq.
- Nalunaaquttap 20.00 kingorna ammasoqarnera immikkut illuinnartuuvoq. Tamanna misiginngisaannarsimavara, Klaus Georg Hansen, Namminersorlutik Oqartussani nunamut namminermut allaffimmi immikkoortortaqarfimmut pisortaasoq, oqarpoq.
Sinerissami qinersiartortoqarluartoq
Qinersinermut peqataasut amerlassusaat maannamut Sisimiuni, Ilulissani, Aasianni Qaqortumilu ajunngilluinnartumik isikkoqarpoq.
Qaqortumi timersortarfissuarmi suli qinersisartoqarluarpoq. Qinersinermi aqutsisoq Peter Petersen paasisutissiivoq, taasisinnaatitaasunit 53,64 procentit Inatsisartunut taasisimasut, 52,74 procentillu kommunimut qinersinermi taasisimasut.
Ilulissani Inatsisartunut taasisinnaatitaasut 3.368-iupput. Taakkunannga 62,5 procentit nal. 19.00 taasisimasut, qinersinermi aqutsisoq Arnaralunnguaq Petersen paasissutissiivoq.
Ilulissani taasisinnaatitaasunit 61,4 procentit kommunimut qinersinermi taasisimapput.
- Ulloq tamakkerlugu qinersiartukaasoqarsimavugut. Coronalu pissutigalugu killilersuisoqaraluartoq ingerlalluarsimavoq, Arnarulunnguaq Petersen oqaluttuarpoq.
Matut parnaartariaqarsimagaat
Sisimiuni qinersinermi aqutsisup misigisimavaa, 2017-imi qinersinermut sanilliullugu kommunimut qinersinermi taasiartortoqarnerusimasoq. Taamaakkaluartoq nal. 19.00 missaani Inatsisartunut taasisut ikinnerusimapput.
Taasisinnaatitaasunit 56,24 procentit Inatsisartunut taasisimapput, tamannalu 2018-imut sanilliullugu 8 procentpointinik appariatsiarneruvoq. Sisimiuini kommunimut qinersinermi 55,7 procentit taasisimapput, tamannalu ukiut sisamat matuma siornamut sanilliullugu 4,7 procentpointinik qaffariarneruvoq.
- Sisimiuni qinersivimmi Taseralimmik nalunaaqutaq sisamat tallimallu akornanni matut sivikitsumik parnaartariaqarsimavavut. Kisianni ulloq tamakkerlugu inoqarluarsimavoq. Ulloq tamakkerlugu akunnermut innuttaasut 250-it missaanniittut kiffartuuttarsimavavut, nerinerullu nalaani akunnermut 150-it missaanniissimapput. Tamanna ajunngilluinnarpoq, Sisimiuni qinersinermi aqutsisoq, Nick Berthelsen, Sermitsiaq.AG-mut oqaluttuarpoq.
Aasianni 46,75 procentit nal. 19.00 kommunimut qinersinermut taasiartorsimapput, Inatsisartunullu 53,21 procentit taasisimallutik.
2017-imi kommunimut qinersinermi kingullermi nuna tamakkerlugu qinersinermut peqataasut 61,1 procentiusimapput, 2018-imilu Inatsisartunut qinersinermi 71,9 procentit taasiartorsimallutik.