Qinersinermi kisitsineq ukioq manna immikkut aporfeqarsinnaavoq

Nalinginnaasumik pisarnermit allakkatigut taasisoqarnerusimanerata malitsigisaanik, ukioq manna kisitsineq immikkut aporfeqarsinnaavoq, qinersinerullu inernerata paasineqarnissaanut piffissaq sivisooq ingerlaqqaarsinnaalluni, qinersinermut ataatsimiititaliap allattoqarfiani pisortaq Klaus Georg Hansen oqaluttuarpoq.

Ukioq manna kommuninut Inatsisartunullu qinersinermi aporfippassuaqarsinnaavoq, qinersinerit taakku marluk kiseqqissaarneqarnerannut kinguarsaataasinnaasunik. 1979-imili 1983-imilu kommuninut inatsisartunullu ataatsikkut qinersisoqarmalli aatsaat taamatut qinersisoqaqqippoq.

- Isumaqarpunga taasisinnaasut 10 aamma 20 procentiisa akornanniittut allakkatigut taasisimassasut. Neriuutigisimasatsinnit ikinnerupput, Nunamut namminermut Naalakkersuisoqarfimmi pisortaq Klaus Georg Hansen oqaluttuarpoq

Taassuma ilisimatitsissutigaa, qasserpiaat allakkatigut taasisimanersut eqqoqqissaartumik kisitsisaatigineqanngitsut, kommuniniilli tallimaasunit nalunaarutigineqarsimasut aallaavigalugit naliliisimalluni.

Qinersinermi angusat qaqagu paasisaqarfigissavavut?

Klaus Georg Hansenip oqaatigisinnaannginnerarpaa, qinersinermi angusat qaqagu paasiaqarfigineqassanersut, kommunit qinersiffiillu ataasiakkaat qanoq piareersarsimanerat apeqqutaammat.

- Kommunit suliassamut piareersimanissaat sapinngisatsinnik isumaginiarsimavarput, inassutigisimallutigu kisitsisut marlunngortinneqassasut, tassani Inatsisartunut kommuninullu taasisimanerit ataatsikkut kisinneqarnissaat anguniarlugu, Klaus Georg Hansen nassuiaavoq.

- Kommunnilli namminersortitaammata, tamatuma qanoq kommunini isumagineqarnissaa aqussinnaanngilarput, immikkoortortaqarfimmi pisortaq erseqqissaavoq.

Aporfiit arlaliusinnaasut

Klaus Georg Hansenilli erseqqissaatigaa, ukioq manna allakkatigut taasisoqarnerusimanera pissutigalugu qinersinerup qanoq inerneqarneranik paasisaqarnissamut arlalinnik aporfeqartoqarsinnaasoq.

Qinersivinnimi allakkatigut taasisimasut ullormi qinersivimmi taaseqqissimannginnerat misissorneqaqqaartussaavoq.

- Allakkatigut taasisimagaanni allakkap puuani siullermi kinaassuseq uppernarsarneqartarpoq. Qinersivimmit misissorneqassaaq inuk pineqartoq ullormi siusinnerusukkut taasisimannginnersoq. Tamanna misissorneqareerpat allakkap puua qaqortoq siullertut isumagineqassaaq. Tassaniimmat innuttaasup taasisimaneranut uppernarsaat. Allakkap puua qaqortoq matoqqatillugu kisitassarpassuit akornannut ilineqassaaq. Allakkalli puui tamarmik ammartiteqqaarneqassapput, Klaus Georg Hansen kinguaattoortoqarsinnaanera pillugu nassuiaavoq

Immiussuinissaq

Qinersinermi ataatsimiititaliap allattoqarfiani pisortaq aporfiusartutut ilisimaneqartoq alla pillugu imatut nassuiaateqarpoq.

- Kommuninut kammaattuutigisimavarput, angusat nalunaarutigineqartarfianut valg.gl-imut immiussuinissaq eqqumaffieqqullugu. Immiussuinissamullu naammattunik inuttassaqartitsisoqanngippat suliaq tamarmi kinguaattoorfiusinnaavoq, Klaus Georg Hansen ilisimatitsivoq.

Sermitsiaq.AG-mi marlunngornermi oqarasuaatikkut pissarsiarineqarami allatorluinnaaq naatsorsuutiginngisamillu aporfeqarsimalluni.

- Aap, ullaaq manna mailikkut atortorissaaruterput ajoquteqarpoq, taamaammallu kommunit allakkatigut attaveqarfiginiarnerat ajornakusoorluni, Nunamut namminermut Naalakkersuisoqarfimmi pisortaq Klaus Georg Hanssen oqaluttuarpoq.

Powered by Labrador CMS