Biilit innaallagiatortut siuariartupiloortut
MG ZS, Mercedes EQC, Hyundai Kona Electric, Nissan Leaf, Maxus Euniq aamma Kia Niro biilit innaallagiatortut Kalaallit Nunaanni nioqqutigineqareersut ilaminiinnannguaraat. Sulilu amerlanernik nioqquteqartoqalersussaavoq.
Kalaallit Nunaanni biilit innaallagiatortut amerliartortuarsinnarput. 2016-imi nuna tamakkerlugu biilit innaallagiatortut 191-it nalunaarsorneqarsimapput.
Kisitsit taanna 2020-mi 747-nut qaffariarsimavoq. Tamatuma saniatigut hybridbiilit 230-t nalunaarsorneqarsimapput. Tamanna politiit ukiumoortumik kisitsisitigut paasissutissaataanni saqqummiunneqaqqammersumi atuarneqarsinnaavoq.
Ataatsimut isigalugu Kalaallit Nunaanni qamutit motoorillit ukiumiit ukiumut amerliartorsimapput. 2016-imi 10.017-init 2020-mi 13.049-nut.
Taakkununnga 4.921-t inuinnaat biileraat, qamuteralaallu 2.913-iullutik. Sinneri tassaapput nioqqutissanik angallassissutit, inuinnaat biilii angisuut, taxat, lastbiilit, bussit, biilit ornigunnermi atorneqartartut kiisalu sanaartornermi maskiinarsuit tamalaat.
Aviisi soqutigineqarluartoq, Motoori, akeqanngitsumik uani atuarneqarsinnaavoq