Ilisimatusartoq: Arlalinnut qinersinissaq qinersisoqarnerunissaanut pissutaasinnaavoq

Inatsisartunut qinersisartut procentitigut amerlanerunerat kommunimut qinersiartortunut amerlanerulertitsisinnaasoq, qinersiartortartut pillugit immikkut ilisimasalik isumaqarpoq.

Inatsisartunut kommunimut, nunaqarfinni aqutsisunut ilagiillu sinniisaannut qinersinissat ullormi ataatsimi tamarmik pisussatut inissinneqarnera ajoriinnagassaagunanngilaq.

Misilittakkat takutippaat qinersivik inuiaqatigiinnit pingaarnertut isigineqartoq eqqorlugu allamut qinersisoqaraangat, qinersiartortut amerlanerujussuusinnaasartut.

Massakkut pisussami, Inatsisartunut qinersiartortartut amerlanerusarput. Taamaattumillu kommuninut qinersiartortut ukioq manna amerleriarujussuarnissaat naatsorsuutigineqartariaqartoq, qinersiartortarneq pillugu ilisimatusartoq, Kasper Mæller Hansen isumaqarpoq.

- Naatsorsuutigisinnaavarput qinersinissani kommunimut qinersiartortut amerleriarujussuassasut. Inatsisartunut qinersinermi qinersiartortut nikinnginnissaat naatsorsuutigissavarput, oqarpoq.

Kasper Møller Hansen, Københavnip Universitetiani Institut for Statskundskabimi professoriuvoq, ukiuni aqqaneq-marlunni kingullerni qinersiartortarneq pillugu ilisimatusarsimalluni.

Qinersinerit allat kivinneqassapput

Naatsorsuutigineqarpoq qinersisartut qinersiartornerminni kommuni eqqumaffiginerulissagaat. Inatsisartunut qinersiartortuartut, kommuninut, nunaqarfinni aqutsisunut, immaqalu allaat ilagiit sinniisaannut qinersinissamik aamma ajornannginnerutitsissapput, ulloq qinersivissaq ataasiummat.

Kommunemut qinersinermi 2017-imi innuttaasut 61,1 procentii qinersiartorput, Inatsisartunullu 2018-imi qinersinermi innuttaasut 71,9 procentii qinersiartorlutik.

- Maanna qinersinissani innuttaasut Inatsisartunuinnaq qinersiartortartut, ukioq manna aamma kommuninut qinersissasut. Qinersivinnut marlunnut qinersinissaq ajornannginnerussaaq, qinersivik ulloq ataasiummat, qinersiartortarneq pillugu ilisimatusartoq oqarpoq.

Qallunaat 2001-imi Folketingimut kommuninullu ullormi ataatsimi qinersisussanngoramik kommunimut qinersiartortut aatsaat taama amerlatigaat. Innuttaasut 85 procentii 2001-imi kommuninut qinersipput, nalinginnaasumik innuttaasut 73 procentii tikillugit qinersisaraluartut.

- Oqartoqarsinnaavoq innuttaasuni qinersiartortut aatsaat taama amerlatigaat. Amerlanerit qinersiartornerannut pissutaavoq ulloq taanna aamma Folketingimut qinersisoqarmat, Kasper Møller Hansen Sermitsiaq.AG-mut oqarpoq.

Partii qinigaq qineqqinneqassaaq

Kasper Møller Hansenip aamma naatsorsuutigaa Inatsisartunut aamma kommuninut qinersinermi partii qinereersimasaq qinerneqaqqittassaasoq.

- Qinersinerit marluk taakku immikkoorluinnarput. Kisiannili assersuutigalugu Inatsisartunut qinersinermi partii qinersimasaq aamma kommunimi qinerneqarnissaa naatsorsuutigineqarsinnaavoq, oqarpoq.

Powered by Labrador CMS