Persuttaasoqartaareernerani inuusuttunut siunnersuisartut amerlineqassasut
Nuummi inuusuttuaqqat unnunnerani persuttaaniarlutik saassussisaartartut tusarsaalermata, Kommuneqarfik Sermersooq inuusuttuaqqanut siunnersuisartunik, unnukkut angalaartartussanik amerlanerusunik aallartitaqalerpoq.
Nuummi innuttaasut, pingaartumillu meeqqat inuusuttuaqqallu, unnukkut silamiinnissaminnut toqqissisimanissaat anguniarlugu iliuuseqartoqartussanngorpoq.
Nuummi inuusuttuaqqat peqatiminnut piffissami kingullermi saassussisaqattaarput. Pisut ilaanni saassussisut 15-it ataallugit ukioqarput, saassunneqartullu aamma taama ukiukitsigisarlutik.
Ajornartorsiut qaangerniarlugu inuusuttuaqqanut siunnersuisartut illoqarfimmi unnukkut angalaarnerulernissaat sapaatip akunnerani matumani piareersarneqarpoq.
Borgmester Charlotte Ludvigsen taama ilisimatitsivoq.
Pissuseq akuersaarneqanngilaq
- Ajornartorsiutit taama ittut kikkunnit tamanit akuersaarneqarsinnaanngilaq. Unge teamsinik taallugit inuusuttuaqqanut siunnersuisartugut illoqarfimmi angalaarnerulernissaat, inuusuttuaqqanillu unnuakkut aneertunut attaveqarnerulernissaat maanna sulissutigaarput. Sulinitsinni politiit suleqatigilluinnarpagut, Charlotte Ludvigsen (IA) Sermitsiaq.AG-mut oqarpoq.
- Unge teamsit unnukkut angalaartareerput. Inuusuttuaqqalli sakkortuumik pissuseqartut takussaaneruneranni amerlanerusut angalaartilernissaat eqqarsaataavoq, aamma angalaartoqarnerulernissaa anguniarparput, borgmester oqarpoq.
Politiit suleqatigineqarput
Suliat ilaanni saassussisut 15-it ataallugit ukioqartut paasineqarput. Suliani taakkunani kommuni politiinut qanimut suleqateqarpoq.
- Meeqqat 15-it ataallugit ukiullit persuttaasimanerat pillugu isumaginninnerup iluani soorunami suliaqarpugut. Aammali suliat sakkortummata politiit qanimut suleqatigaagut, iliuusissallu pillugit politiit aamma ataqatigiissaaqatigaagut, borgmesteri nassuiaavoq.
Inuusuttuaqqat klubbinut ornigussinnaajuaannarnerat borgmesterip oqaatigaa. Katersuunnissamullu killilersuutit ornigunnissamut akornusiinngitsut isumaqarluni.
- Aammali angajoqqaanut eqqaasitserusuppunga, ikorfartorneqarnissamut pisariaqartitsigunik qaqugukkulluunniit Børne- aamma Familiecenterimut saaffiginnittuaannarsinnaapput. Ikiorneqarsinnaapput, Charlotte Ludvigsen oqarpoq.
Inuusuttunut siunnersuisartut qanoq amerlatigisut aamma qaqugukkut illoqarfimmi ingerlaartassanersut pillugit sapaatip akunnerani matumani ersarinnerusumik nalunaaruteqartoqarumaarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...