Nagdlunguak cup-imik unammersuaartitsinermi ajugaavoq
Ilulissani futsalimi KNI Cup 2021 akunnerup naanerani ingerlanneqarpoq.
Corona pissutaalluni unammersuaarnerit uninngatinneqarallareersut kiisami unammersuaartoqarpoq.
Ulluni 19-21 februar 2021 Ilulissani Nagdlunguup aaqqissugaanik KNI CUP 2021 ingerlanneqarpoq, holdit 6-illit peqataaffigisaannik.
Peqataasut tassapput Nagdlunguak hold 1, Nagdlunguak hold 2, Nagdlunguak Oldboys, I-69 hold 1, I-69 hold 2 kiisalu Qaanaaq Sport Club.
Sapaammi inissinniuttoqarnerani finalimi Nagdlunnguarmiuinnaat unammipput, tassani Nagdlunguak hold 1 ajugaasuuvoq, Nagdlunguak hold 2 unammersuaarnermi aappaattut inissillutik.
KNI Cup 2021-mi I-69 hold 1 bronzinnattuupput.
Unammersuaarnermi nunanut allanut unammisartunut sungiusaasut Rene Olsen aamma Lok’e Svane Ilulissanut malinnaajartorput.
Taakku aamma arsallammannik toqqaanermut ikiuupput.
Toqqarneqartullu ukuupput:
- Akiuutillammak: Qillaq Kristiansen QSC
- Arsalerillammak: Peter Leibhardt N-48 I
- Arsallammak: Lars-Erik Reimer N-48 I
Tassani inernerit ima isikkoqarput.
- 1. N-48 I
- 2. N-48 II
- 3. I-69 I
- 4. N-48 oldboys
- 5. QSC
- 6. I-69 II