Kommunimut aamma Inatsisartunut qinersisoqartussaanera pissutaalluni kommunimut qinigassanngortittut politikkikkut anguniakkatik allatut eqqarsarnikkut saqqummiussiniarput.

Qeqqata Kommuniani borgmesterip Malik Berthelsenip qineqqusaarnermi Facebook aqqutigalugu anguniakkani saqqummiuttarniarlugit oqarpoq.

- Inatsisartunut qinersisoqarnerani kommunimut qinersisoqartussaanera uggoraara. Ataatsikkut qineqqusaartoqarneratigut aarleqqutigaara kommunimut qineqqusaarneq Inatsisartunut qineqqusaartunit qallersimaneqarnissaa. Inatsisartunut qinersineq kommunimut qineqqusaartunit innuttaasunit soqutigineqarnerorpasittartoq ilisimavarput, taamaammat aarlerinartoqartippara qineqqusaarneq Inatsisartunut qineqqusaartut sammineqarnerussasut, Sermitsiaq.AG-mut oqarpoq.

Kommunimut kingullermik qinersinermi innuttaasut qinersisinnaasut 61,1 procentii qinersipput, Inatsisartunut qinersinermi kingullermi 71,9 procentiulluni.

Nittartagaq avammut nittarsaassisoralugu

Taamaattumik Facebook aqqutigalugu aamma qineqqusaassalluni oqarpoq.

- Ukiuni makkunani Facebook atugaaleraluttuinnarpoq, taanna aqqutigalugu soqutiginarsaassaanga. Qineqqusaarnermi innuttaasut soqutiginninnerat allanngoratarsinnaavoq, innuttaasut akornanni politikkimik qatsussisoqarsinnaavoq ernummatigivara. Taamaattumik Facebook aqqutigalugu qineqqusaarnissaq pingaaruteqassaaq soqutiginarsaaneq eqqarsaatigalugu, Malik Berthelsen oqarpoq.

Malik Berthelsen 522-nik taaguunneqarluni kommunimut qinersinermi kingullermi Qeqqata Kommuniani borgmesterinngorpoq. 

- Borgmesteritut ingerlaqqinnissara anguniarpara, tamannalu pissasoq neriuutigaara, oqarpoq.

Kommunimut aamma Inatsisartunut apriilip arferngani qinersisoqassaaq.