Illussanik titartaasartoq: Sanaartornermut malittarisassat nutaat nutaajunngillat

Nutaanik illuliornermut malittarisassat nutaanik malittarisassaliornikkut maanna tusarniaassutigineqartukkut nutarterneqassapput. Siunersuulli sakkortuumik isornartorsiorneqarpoq, Kalalllit Nunaanni pissutsit aallaavigineqarsimanngimmata aamma nutaaliornerunngimmat.

Kalaallit Nunaanni sanaartornermut malittarisassat siulliit 1982-imi atuutilerput. Illussanik titartaasartoq Thomas Riis naapertorlugu Danmarkimi sanaartornermut malittarisassat qangarnisat assilipajaaginnarlugit suliaasimalluni.

2006-mi Kalaallit Nunaannit nutaanik malittarisassaqartoqalerpoq, tassani 1982-imi malittarisassat assigipajaarlugit ilusilersorneqarsimallutik. Tassanili sakkortunerusunik piumasaqaaterpassuaqarluni. Maannalu siunnersuut nutaaq 2006-imi malittarisassanik ingerlatitseqqiineruinnartnerusoq saqqummiunneqarpoq.

- Immaqa - nalaatsornerinnaavoq - aalajangersakkat arlallit Danmarkimi ukiut qulit matuma siorna assipajaavattut sukaterneqarsimanerat, taamaakkaluartoq aaqqissuussaassusaanik tunngavianillu allannguivallaartoqarsimanngilaq, illussanik titartaasartoq Thomas Riis sermitsiaq.AG-mut oqarpoq.

Thomas Riis namminersortuuvoq sanaartornermi, pilersaarusiornermi, suliniutinik inerisaanermi, aaqqissuussinermi illullu iluani silaannarmut tunngatillugit siunnersuisartoq.

Pingaarnertut maalaarutigisaa tassaavoq, Kalaallit Nunaanni sanaartornermut malittarisassat Kalaallit Nunaannut nappertuutinnginnerat.

- Kalaallit Nunaanni sanaartoriaaseq sanaartornermilu ileqquusartut arlalippassuartigut danskit ileqquannit allaanerupput. Taamaammat assersuutigalugu Norgemi malittarisassat aallaavigalugit malittarisassaliortoqarnissaa isumaqarnipilussuussaaq, taanna oqarpoq.

Silaannarissarfilersuivallaarneq ajoqusiisinnaasoq

Thomas Riisip missingiummi nutaami ajornartorsiutaalluinnartussat marluk takusinnaasai tassaapput silaannarissaarfilersuineq ikuallajaallisaanermullu tunngassuteqartut.

- Pingaartumik silaannarissarfiit pillugit aalajangersakkat nutaat ajorluinnarput. Taakkumi sanaartorneq najugaqarnissarlu akisunerulersissavaat, Thomas Riis oqarpoq.

- Silaannarissarfiit pillugit malittarisassat nukimmik atuinerulernermik nassataqassapput, illullu iluani silaannalunnerulersitsisinnaallutik, tamatuma akerlia anguniarneqarunaraluartoq, taanna itisiliivoq

Malittarisassat nutaat malillugit, illuni tamani silaanarissarfiit assigiit ulloq unnuarlu silaannarissaasartussat assigiimmik piumasaqaatitaqartut atuutsinneqalissapput.

- Kalaallit Nunaanni pissutsit eqqarsaatigissagaaanni illup iluata silaannarissarneqarpallarnissaa ajorluinnartumik kinguneqassaaq, silaannarmi silamiit ilummut supoortitassarput Danmarkimi silaannarmit panernerujussuuvoq, Thomas Riis oqarpoq.

Ikuallajaallisaanissaq kipparippallaartoq

Ilaatigut tamanna tunngavigalugu isumaqarpoq, Danmarkimi malittarisassat assilineqassanngitsut. Isornartoqartitaata aappaa tassaavoq ikuallajaallisaanermut malittarisassatoqqat nutarterneqarsimannginnerat.

Immikkoortiterineq

Illut ikuallajaallisakkat atortunik ikuallassinnaanngitsunik sanaajussapput, atortut soorlu sisaat, gipsit, qammasissiat, marraat, betongit kiffiutissiallu atorlugit sanaajussaspput.

Ikuallatsikkuminaatsunik illu atortulersorneqassaaq, taakku tamakkiisumik ilaannakortumilluunniit ikuallassinnaasunik atortoqassapput, soorlu qisuk piffissami sivisuumi ikuallatsikkuminaassinnaasoq. Amerlasuutigut atortut ikuallassinnaasut ikuallatsikkuminaatsumik poorneqarsimasarput.

Pissarsiffik: Bolius

Immikkoortiterisimanermi matumani illut ikuallajaallisakkat ikuallatsikkuminartullu atorneqarsimapput. Ikuallassinnaava imaluunniit ikuallassinnaanngila? Europami immikkoortiterisarneq atorneqarunnaarsimavoq, taasungalu taarsiullugu aperisoqartalerluni: Ikuallatsikkuminarpa ikuallatsikkuminnaapaluunniit imaluunniit ikuallatsinneqarsinnaanngila? Ikuallakkuni toqunartumik pujuliussava?

- Pissutsit taakku ikuallajaallisaanermut pingaaruteqarnipilussuupput, tassa sanaartuga qisuttaqartoq illutut ikuallajaallisakkatut oqaatigineqarsinnaanngilaq..

Immikkoortiterisarneq nutaanngitsoq atorlugu nunami maani sanaartortoqassappat, qisuk atorlugu quleriiaannik illuliortoqarsinnaanngilaq, qisuup ikuallassinnaanera pissutigalugu qisummik sanaartortoqarnissaa inerteqqutaammat, tassa qisuk ikuallassinnaajunnaarlugu sanaartukkamut ilanngunneqarsimagaluarpalluunniit, Thomas Riis nassuiaavoq.

Powered by Labrador CMS