Coronartoqassappat qinersineq takinerusinnaavoq
Qinersinissamut ullualuinnanngornerani coronavirusimik tunillatsittoqassagaluarpat ullut arlallit qinersisoqartoqarsinnaanera periarfissaasinnaasoq, Namminersorlutik Oqartussani qinersinermut ataatsimiititaliaq kommuninut ilisimatitsivoq.
Qinersisoqartinnagu kingusinnerpaamik ullut tallimat sioqqullugit coronavirusimik tunillatsissimasumik nassaartoqarpat, innuttaasut ulluni arlalinni qinersiartorsinnaanissaat periarfissaaratarsinnaavoq.
Kingusinnerpaamik 1. april coronavirusimik tuniluuttoqarpat, kommunimut Inatsisartunullu qinersisoqarnissaa ullunik marlunnik pingasunilluunniit sivisussuseqarsinnaavoq. Namminersorlutik Oqartussani, Nunamut Namminermut immikkoortortaqarfik kommuninut tamanut taama ilisimatitsisimasoq, Avannaata Kommuniata nittartagaani atuarneqarsinnaavoq.
- Kingusinnerpaamik sisamanngorneq ulloq 1. april 2021 inoqarfimmi coronamik tunillatsittoqarsimallutik tuniluuttoqartoq peqqissutsimut oqartussat paasissagaluarpassuk, qinersineq Nunatsinni Nakorsaaneqarfimmiit aalajangiineq malillugu ullut arlallit ingerlanneqassaaq, allassimavoq.
Ullut qinersiviit marluk pingasulluunniit
Najukkami coronavirusimik tunillatsissimasoqarpat maleruagassaqartoqarsinnaavoq. Najukkami qinersisinnaatitaasut 200-t ataappagit, qinersineq ulluni marlunni ingerlanneqarsinnaassaaq, tassa ulluni ataasinngorneq 5. april aamma marlunngorneq 6. april.
Najukkani qinersisinnaasut 200-t sinneqarpata, qinersineq ulluni pingasuni ingerlanneqarsinnaavoq, tassa ulluni sapaat 4. april, ataasinngorneq 5. april aamma marlunngorneq 6. april.
- Ulluni arlalinni qinersineq suliaqarnikkut qanoq ingerlanneqassanersoq kommunit ilitsersornissaannut Qinersinermut ataatsimiititaliamut allattoqarfik piginnaatinneqassaaq.
Qinersineq nalinginnaasuusinnaavoq
Qinersinermut ataatsimiititaliap ilisimatitsissutigaa qinersineq 6. april pilersaarut malillugu ingerlanneqarsinnaasoq, 1. april qaangiutereersoq tuniluuttoqarpat:
- Inoqarfimmi corona tuniluutilersimasoq ulluni 2., 3., 4., 5. imaluunniit 6. april peqqissutsimut oqartussanit paasineqassagaluarpat, Qinersinermut ataatsimiititaliaq ulloq qinersiviusoq tikitsinnagu Nunatsinni Nakorsaaneqarfik isumasioqatigalugu allamik aalajangiisimanngippat, qinersititsineq taamaallaat ulloq qinersiviusussaq 6. april 2021 ingerlanneqassaaq.