Qinersineq: Allakkatigut taasineq qinigassanngortinniarlunilu nalunaarnissaq imatut ingerlanneqassapput
Kommunimut qinigassanngortinniartut aqangu kingusinnerpaamik qinigassanngortinnerminnik nalunaaruteqassapput. Kommuninili januaarip aallaqaataaniilli allakkatigut taasisoqarsinnaalereernikuuvoq.
Apriilip arfernani qinersisoqarnissaanut qinigassanngortinniartut tamarmik qinigassanngortinnerminnik suli nalunaaruteqarsimanngillat, imaluunniit sassaqqinnianngitsut ilaat sassaqqinniannginnertik pillugu suli nalunaaruteqarsimanngillat.
Taamaakkaluartoq kommunimut, ilagiit siinniisaannut nunaqarfinnilu aqutsisunut jaunaarimili allakkatigut taasisoqarsinnaalereersimavoq. Inatsisartunut februaarip 23-at aallanerfigalugu allakkatigut taasisoqarsinnaavoq.
Qinersinissanut tamanut atatillugu imaappoq, qinigassanngortinniartut suli sassarnerminnik nalunaaruteqanngitsut taasisoqarsinnaavoq, tamannalu unammillernartoqarsinnaalluni.
Pappiaraq taasivissaq imaqanngitsoq
Allakkatigut taasiniartut pappiaqqamik taasivissamik qinigassanngortittut aqqanik allassimasoqanngitsumik tunineqassapput. Pappiaqqamut taasivissamut inuup qinerniakkap aqqa partiilluunniit aqqa allanneqassaaq.
Taamaasilluni inuk qinigassanngortissimanngitsoq taaneqartoorsinnaavoq. Inummik qinigassanngortissimanngitsumik taasisoqarsimappat, taasineq atorsinnaassanngilaq, Namminersorlutik Oqartussani nunamut namminermut immikkoortortaqarfik ilisimatitsivoq.
Allakkatigut taasinermi taamatut pisoqariataarsinnaavoq, Namminersorlutik Oqartussat nunamut namminermut immikkoortortaqarfiani pisortaq Klaus Georg Hansen Sermitsiaq.AG-mut oqarpoq.
- Taamaammat inummik nuimasumik partiilluunniit aqqanik taasilluni allannissaq qularnaannerpaassaaq, taanna inassuteqarpoq.
Qinigasssanngortinniarluni nalunaaruteqarnissamut piffissaliussat:
Kommunimut qinersineq, marlunngorneq 23. februar 2021
Ilagiit sinniisaannut qinersiq, marlunngorneq 9. marts 2021
Inatsisartunut qinersineq marlunngorneq 16. marts 2021
Nunaqarfinni aqutsisunut qinersineq marlunngorneq 23. marts 2021
Internet aqqutigalugu taasisoqassanngitsoq
Qinigassanngortissimanngitsumilli allakkatigut taasisisimagaanni, allakkatigut taasimasaq allanngortinniarlugu apriilip arfernani taasifissamut takkulluni taasiartortoqarsinnaavoq.
Allakkatigut taasinerit ulloq qinersiviusoq matuppat aatsaat inini taasiffiusuni kisillugit aallartinneqassapput. Takkulluni taasiartornermi allakkatigut taasimasaq peerneqassaaq, tassa marloriarluni taasisoqannginniassammat.
Qinersinissani pineqartuni internet aqqutigalugu taasisoqarsinnaassanngilaq. Internet aqqutigalugu taasisinnaanermik suliaqarneq aallartinneqareerpoq, periarfissarli tamanna siusinnerpaamik 2020-p aallartinnerani aatsaat atorneqarsinnaalissaaq, nunamut namminermut immikkoortortaqarfimmit ilisimatitsipput.