Sermersooq suliffeqarfinnik annaasaqarusunngitsoq
Kommuneqarfik Sermersuumi borgmesterip Namminersorlutik Oqartussat allaffissornikkut suliffeqarfiutaasa Nuummiiginnarnissaat kissaatigineruaa. Suliffeqarfiit sinerissamut nussornissaannik kissaateqartoqarnera avissaartuutsitsilissaaq, borgmester isumaqarpoq.
Suliffeqarfiit ineriartornerlu pillugit Nuuk Kalaallit Nunaatalu sinnera unammitinniarsarineqassanngillat.
Kommuneqarfik Sermersuumi borgmester Charlotte Ludvigsen taama isumaqarpoq. Taassuma suliffeqarfiit Nuummiit nussunngikkaluarlugit sinerissami nutaanik suliffissaqartitsilernissaq ujartorusunneruaa, illoqarfiit pingaarnersaannik ineriartortitsineq unitsinngikkaluarlugu.
- Taamaattumik ataqatigiittariaqarpugut ataatsimoorlutalu inuiaqatigiit pitsaanerulersinnissaannut iliuuseqartariaqarluta. Ima oqaatigineqarsinnaavoq, pissarsiassat assortuussutiginatigit ataatsimoorluta kikkut tamarmik naammattunik pissaqarnissaat anguniarlugu pissarsiassagut anginerutinniartariaqarpavut, tusagassiorfinnut nalunaarummini allappoq.
Sinerissamut nussuinissamut pilersaarut
Siumut siulittaasua, Erik Jensen, qitiusumik allaffeqarfimmi suliffiit Nuummiit sinerissamut nussornissaanut pilersaarut pillugu Sermitsiaq.AG-mut nassuiaassuteqaqqammerpoq. Ilaatigut assersuutigaa savaateqarneq nunalerinerlu pillugit malittarisassat Kommune Kujallermi ilisimaneqarnerussasut suliariuminarnerutinneqassasullu, soorlu aamma kisermaassilluni ingerlatsivissanut nunaminertanik agguaassisarneq kommunini ingerlanneqarsinnaasoq.
Ludvigsen tassani isumaqataavoq. Illoqarfiilli pingaarnersaat pilliutigalugu suliffiit nutaat pilersinneqartariaqanngitsut unnerluni:
- Namminersorlutik oqartussaniit akisussaaffiit Kommuninut nuussorneqarnissai aammalu Inuiaqatigiit tamaasa nunamilu inoqarfiit tamaasa ineriartortissagivut pillugit Erik Jensen isumaqatigilluinnarpara. Missingersuutit pillugit inatsisitigut nuutsitsinikkullu Nuup ineriartornera aporfilersorlugu tamanna anguneqarsinnaanngilaq, oqarpoq.
Avissaartuunneq kissaatigineqanngilaq
Suliffeqarfiilli Nuummiittut pissutaaqataallutik illoqarfiit pingaarnersaat nunatta aningaasaqarneranut tapeeqataalluartartoq, Charlotte Ludvigsen erseqqissaavoq.
- Kalaallit Nunaata sinneranut naligiissaarinikkut toqqaannartumik 300 millionit koruuninik ukiut tamaasa akiliisarpugut aamma innaallagissamut, imermut, kiassarnermut, nassiussuisarnernut, oqarasuaatinut internetimullu Nuummi innuttaasut akiliivallaartarnerat ilanngukkaanni inoqarfinni allani tamakku akii appasinniassammata, Sermersooq 1 milliardit koruunit missaannik tapeeqataasarpoq, borgmesteri allappoq.
Nuummi ineriartorneq innarlinngikkaluarlugu najukkani allani suliffinnik pilersitsisinnaanerup periarfissaanera tikkuarpaa. Assersuutigai ukiuni kingullerni Tasiilami kalaalimineerniarfiliorneq, Paamiuni suliffissaaleqisut ikilisinneqarsinnaasimaneri aamma Tasiilami nutaamik qimarnguiliorneq.
- Nunarput siuttumik sumiiffinni tamani illoqarfinni nunaqarfinnilu ataatsimoortitsisumik pisariaqartitsivoq. Peqatigiilluta nunarsuarmioqataanissarput nunanilu allamiut Nunatsinni soqutiginnileraluttuinnarnerat ammaffigissagipput Nunatta pisariaqartippaa. Nunatta iluani ataatsimoornata akersuutiinnaraluarutta nunatut nunani tamalaani isumaqatigiinniallaqqittunngorsinnaanatalu atugarissaartunngorsinnaanngilagut.
- Siusinnerusukkut Siumut siulittaasorisimasaasa siuttuunerisa nalaanni avissaartuunneq sakkortuumik misigsareernikuuarput tamannalu misigeqqikkusunnanngeqaaq, Sermersuumi borgmesteri allappoq.
