Allaatigisaq: Akilersilluni peqquserluttarneq imatut pinngitsoortissinnaavarput

Inatsisartut 2019-imi upernaakkut aalajangerput, akilersilluni peqquserluttarnerup akiorniarneqarnera qanoq nukittorsarneqarsinnaanera aamma whistleblowerimik aaqqissuussap qanoq pitsanngorsaaffigineqarsinnaanera pillugit erseqqissaasussamik misissuisoqassasoq.

Nalunaarusiaq 60-it angungajallugit quppernilik 2020-mi novembarip qaammataani naammassineqarpoq, Aningaasaqarnermullu Naalakkersuisup Vittus Qujaukitsup tassunga atatillugu malitsitut allagaani sisamanik quppernilimmi allassivoq, ”akilersilluni peqquserluuteqartarnerup akiorniarneqarnera pillugu inatsit akilersilluni peqquserluuteqartarnerup akiorneqarnera pillugu inatsisaanani takoqqusaartumik politikkiunerorpasippoq”.

Misigisaq

- Nalunaarusiami akilersilluni peqquserluuteqartoqartarnerata - nunami maani atuunnerata ajornartorsiutaaneranik misigisaqartarnermut sanilliullugu tunngavissiinngikkaluartoq, isumalluutit eqqarsaatigalugit inatsimmik taamatut ittumik sananissaq siunertamut naapertuunnersoq eqqarsaatigineqartariaqartoq, Vittus Qujaukitsoq isumaqarpoq.

Aningaasaqarnermut Naalakkersuisup qulaajaasimaneq annertooq tunngavigalugu oqaatigaa, akilersilluni peqquserluuteqartarnermik akiuiniarneq oqartussaqarfinni ataasiakkaani isumagineqarsinnaasoq, tassa whistleblowerimik aaqqissuussap atorneqarnera aqqutigalugu tamanna nukittorsarneqarsinnaammat.

Inassuteqaatit

Inassuteqaatit tigulaariffigalugit imatut allassimapput:

Aatsitassarsiornermut aalisarnermullu atatillugit inatsisit kiisalu nunaminertamik tunniussisarnermut malittarisassat paasiuminaattuupput. Ajornaannerusunik paasiuminarnerusunillu malittarisassaqarnissaq inassutigineqarpoq.

Aalisarnermi piginnittuuneq, akuersissutit, pisassiissutit tunisinermilu akigititat pillugit nalunaarsuisoqartarneratigut ammanerusumik ingerlatsisoqartalernissaa, tassa misissueqqissaartoqartarlunilu assersuussisarnissaq anguniarlugu. ”Taamaaliornikkut ammanerusumik ingerlatsisoqartalerlunilu pasitsaassisarnerit tusatsiakkanillu oqaluuserinnittarnerit pinngitsoortinneqartalissapput”.

Inatsisartut Kukkunersiuinermut Ataatsimiititaliaanni politikkerit qinigaaffik tamakkerlugu sulisarnissaat, taamaalilluni ataavarnerusumik sulisoqalertassaaq, ataatsimiititaliarmi malittarisassanik malinninngittoqarnissaanut akilersillunilu peqquserluttoqarnissaanut pingaarutilimmik illersuisuuvoq.

Politikkikkut partiinut tapiissuteqartarneq: Tapiissuteqartup aqqa partiip naatsorsuutaani kisimi allassimasassanngilaq. Aamma 10.000 koruunit sinnerlugit kina tapiissuteqarsimanersoq allassimasassaaq. Malittarisassat malinneqarnersut pillugu misissuisoqartassaaq.

Whistleblowerimik aaqqissuussaq Namminersorlutik Oqartussani sulisunut kisimi atuunnani tamanut atuutissaaq. Inatsisartut Ombudsmandiata saaffiginnissutit suliarisinnaasagai siunnersuutigineqarpoq.

Ingerlatsivimmi politikkerit sulisullu akilersilluni peqquserluuteqartarnerup akiorniarneqarneranut aaqqissuussaasumik ilinniartinneqassapput.

Suliamut attuumassuteqarpallaarneq pillugu malittarisassat assigiimmik paasineqartuaannanngimmata pissusilersuutinut atatillugu erseqqinnerusumik malittarisassaliortoqassaaq, aamma suliat qularnartoqartillugit inatsiseqarnermut immikkoortortaqarfimmi oqaloqatiginnittussaaneq atuutsinneqalissaaq, sulianillu suliarinnittarneq nakkutigineqartalissalluni.

Vittus Qujaukitsoq allappoq, nalunaarusiaq "isumassarsiorfittut" isigineqassasoq, aamma oqartussat suliaat paasiuminarnerulersinniarlugit pitsaassusaallu qaffanniarlugit pitsanngorsaanissaq inissaqartoq.

Inatsisartut aalajangissagaat

- Siullertut Inatsisartut nalunaarusiamik suliaqartitserusussimasut tamanna pillugu eqqarsaasersortariaqarput, Vittus Qujaukitsoq inassuteqaatit naammassineqarnissaannut atatillugu allappoq.

Siunnersuisarfik Nordic Consulting Group A/S nalunaarusiamik suliaqarsimavoq, annertuumillu nalunaarusiornerup saniatigut Nuummi Ilulissanilu inunnik katillugit 36-nik apersuisarsimalluni. Aamma Danmarkimi oqaloqateqartarsimavoq.