Erik Jensen: Aajuna nussuinissamik pilersaarut
Erik Jensenip qineqqusaarutissaasa pingaarnerpaartaasa ilaat tassaavoq suliffeqarfinnik Nuummiit sinerissamut nussuinissaq. Matumani sooq qanorlu taama pisoqassanersoq nassuiarpaa.
Nuummi innuttaasut amerliartorluarput, kisianni tamanna Kalaallit Nunaata ukiut 20-t 30-lluunniit qaangiuppata arlaqanngitsuinnarnik inoqarfeqalersimaneranik inerneqartariaqanngilaq, Siumup siulittaasua, Erik Jensen, Sermitsiaq.AG-mi innuttaasut tamarmik pingajorarterutaasa maanna Nuummi najugaqalersimanerannik nutaarsiassamik qanittukkut atuarsinnaasimasoq, oqarpoq.
Ineriartorneq siammarneqassaaq
- Ineriartornermik siammaanissarput pingaaruteqarpoq. Assersuutigalugumi Nuummut nuukkusuttorpassuit inissaqartinneqanngillat. Taamaattumik sinerissami illoqarfiit aamma pilerinarnerusunngortinneqartariaqarput. Tamannalu pissaaq Namminersorlutik Oqartussani qitiusumik allaffissornerup ilaata kommuninut nuutsinneratigut, Erik Jensen oqarpoq.
Suliffeqarfiit sorliit pineqarnerat tigussaanerusumik oqaatigisinnaaviuk?
- Allaffissornikkut suliassat arlallit kommunini pitsaanerusumik isumagineqarsinnaapput. Illoqarfiit avataanni assersuutigalugu kisermaassilluni ingerlatsivissanut nunaminertanik agguaassisarnermik aqutsineq aeersuutigilara. Kommunini tamatumunnga tunngasunik ilisimasaqartoqarneruvoq. Aap, sooq qitiusumik allaffeqarfimmi atorfilittanit savaateqarneq nunalerinerlu pillugit malittarisassat aqunneqassappat. Tamanna Kommune Kujalliup pitsaanerujussuarmik ingerlassinnaassavaa, Erik Jensen oqarpoq suliassaqarfillu allarluinnaq aamma tikkuarlugu:
- Ineqarnermut tunngasunik aqutsineq aamma kommuniniittariaqarpoq. Taakkunani pisariaqartitsinerup sumiinnera ilisimaneqarpoq, Siumup siulittaasua, partiitoqqamut sammivimmik nutaarluinnarmik siunniussaqartoq, oqarpoq.
Suliassaq sapinngilaat
Erik Jensenip erseqqissaatigaa qitiusumut eqitertitsiunnaartoqartariaqartoq, tamatumanilu suliassat amerlanerujussuit kommuninut nuunneqartariaqartut, taakkualu suliassat sapinngikkaat upperilluinnarpaa.
Kommunit inunnik ilinniagaqarsimanikkut eqqortunik piginnaanilinnik kajungilersitsisinnaannginnissaat ersissutiginngiliuk?
- Aap, ersissutiginngilluinnarpara. Soorunami ikaarsaariarfeqassaaq, tamatumanilu aallartinnermi ajornartorsiutinik pilersoqarsinnaassalluni, kisianni suliassat kommuninit kivinneqarsinnaanissaat tatigilluinnarpara, erseqqissaavoq.
Naligiinneq
Siumup siulittaasuata illoqarfiit pingaarnersaata kommuniani akissarsiat assersuutigalugu pisortani atorfillit Avannaani Kujataanilu kommuninit pissarsiarisartagaannit qaffasinnerujussuunerat uparuarpaa.
- Inuiaqatigiinnik naligiiffiunerusunik pilersitsisariaqarpugut. Suliassaq ajornartorsiutitaqanngitsoornavianngilaq, kisianni killilersuutinut taarsiullugu periarfissanik isiginiagaqartartutut ilisimaneqarpunga, pilersaarut pillugu oqarpoq.
Siumut qinersinerup kingorna aalajangiisuusumik sunniuteqaannarsinnaassappat pilersaarutip ukiunik tallimanik pisoqaassuseqartup sammineqaqqilernissaa nalilersoqqinneqarnissaalu pilersaarutaavoq.
Nalunaarusiaq sammineqaqqissasoq
Erik Jensenip nalunaarusiaq ”Naligiimmik siunissaqarneq”, Siumut sinnerlugu taamani borgmesteriusunit pingasunit Jørgen Wæver Johansenimit, Hermann Berthelsenimit aamma Ole Dorph ukiut tallimat matuma siorna saqqummersinneqartoq, innersuussutigaa.
- Borgmesterit taakkua pingasut suliffinnik 600-nik sinerissamut nussuinissaq tikkuarpaat. Maanna pilersaarut nutarterneqassaaq, suliffiillu tigussaasut qassit sorliillu siammarneqartariaqarnerat pineqartillugu sumut killikkumaarnerluta takussavarput, allaffissornermik innuttaasunut qaninnerusumiittumik pilersitsisinnaaqqulluta, Erik Jensen oqarpoq.