Natuk Nunalerinermut Siunnersuisoqatigiinnut siulittaasunngortoq

Naalakkersuisut Natuk Lund Olsen Nunalerinermut Siunnersuisoqatigiinnut siulittaasutut nutaatut toqqarpaat, siunnersuisoqatigiillu siulittaasortaaq peqatigalugu Qaqortumi ataatsimeeqqammerput.

Nunalerinermut Siunnersuisoqatigiinnut siulittaasunngortup Natuk Lund Olsenip Carl Frederiksen, januaarimi tunuartoq, kingoraarpaa.

Natuk Lund Olsen Ilisimatusarfimmi inuiaat piorsarsimassusaanni oqaluttuarisaanerannilu bacheloreqarpoq kiisalu Aarhus Universitetimit antropologiimit politikkikkullu oqaluttuarisaanermi kandidatiulluni. Tamatuma saniatigut kalaalimerngit pillugit ph.d.-nngorniumminik ingerlataqaleruttorpoq.

Natuk Lund Olsen Aalisarnermut, Piniarnermut Nunalerinermullu Naalakkersuisoqarfimmi sulisut peqatigalugit ilaatigut Kommune Kujallermik, Innovation South Greenlandimik aamma Neqi A/S-ip pisortaanik ataatsimeeqateqarsimavoq nunalerinermillu inuussutissarsiutip siusarnissaanut suleqatigiinnerunissamut periarfissat eqqartorsimallugit, Naalakkersuisut tusagassiuutitigut nalunaaruteqarput.

Immikkoortumut pilersaarut nutaaq

Nunalerinermut Siunnersuisoqatigiit nunalerinermut immikkoortumut pilersaarummik 2030-p tungaanut atuuttussamik suliaqartoqarsimaneranik nuannaarutiginninnerat ilisimatitsissutigineqarpoq.

- Tamatumunnga atatillugu Nunalerinermut Siunnersuisoqatigiit ulluinnarni aqutsisunik nutaanik pilersitsipput, Kalaallit Nunaanni nunalerineq siuarsarniarlugu suliniutit pisariaqartut aallartisarneqarnisaannut peqataassallutik,taamalu inuussutissanik imminut pilersorsinnaanerup annertusarneqarneranut peqataassallutik, ilisimatitsissutigineqarpoq.

- Taamatuttaaq Savaatillit Peqatigiit Suleqatigiissut (SPS) suleqatigalugit misileraanermut ataatsimiititaliamik, Upernaviarsummi ineriartortitsinermik suliamik pitsanngorsaasussamik, pilersitsisoqarpoq.

Powered by Labrador CMS